Qonaev qalasyn qaq jaryp ótetin qasqa joldyń boıynda kóne kólikter mekeni bar. Ataý-soıy da adam kóńilin typyrshytatyndaı «Tulpar» dep atalady. Osy retrosalonnan ótken ǵasyrdyń 50-80 jyldarynda jasalǵan eski kólikterdiń túr-túrin kórýge bolady.
Qazir retrosalonda qyryq shaqty kólik bar. Eski avtomobılderdiń bárin salonnyń ıesi, aımaqqa belgili kásipker, mesenat Murat Sirgebaev qalpyna keltirip, óńdegen kórinedi.
– Kóne jádigerlerdi janym súıedi. Eski kólikter salonyn ashqanǵa deıin atamzamanǵy radıoqurylǵylardy, grammafondardy, plastınkalardy, ydystardy jınadym. Birde qaladan eskirgen gazdy sý satatyn apparat kórip qalyp, álgini satyp aldym. Eskirgen demeseń, qalypty jumys istep tur eken. О́zim kólikqumarmyn. Osydan keıin nege avtosalon ashyp, oǵan eski kólikterdi qoımasqa dep oıladym. «Tulpardyń» tusaýy osylaı kesildi, – deıdi kásipker, mesenat Murat Sirgebaev.
Búginde retrosalondaǵy eń qymbat jádigerdiń biri – Dinmuhammed Qonaevtyń qyzmettik kóligi. Keńes odaǵyndaǵy avtoóndiristiń maqtanyshy bolǵan «Gaz-14» jeńil kóligi úkimet qyzmetindegi adamdarǵa minýge arnalyp jasalǵan edi. Jalpaq jurtqa «Chaıka» ataýymen tanylǵan kóliktiń birin kezinde Qonaev taqymdaǵan. Keıinnen eskirip, esepten shyqqan sol «Chaıka» metall synyǵyna ótip kete jazdapty. 2014 jyly kóliktiń habaryn kezdeısoq estip qalǵan Murat Sirgebaev ony taýyp, tolyqtaı óńdep shyqqan.
– Qonaev aqsaqal mingen kólikti jóndep, tolyqtaı árleýge 8 aı ýaqyt ketti. Bul ózi sırek kezdesetin model bolatyn. 1977 jyldan 1988 jylǵa deıin sovettik avtoóndiris 1 114 «Chaıka» shyǵarǵan. Onyń kóbin basshylar mingen. Uzyndyǵy 6 metr 30 santımer bolatyn alyp kólik óz zamanynda qol jetpes arman bolǵan. Ári Dımash atamyzdyń izi qalǵan kólik bolǵan soń bizdiń salondaǵy qymbat jádigerlerdiń qatarynda tur. Budan bólek sol kezeńniń kýásindeı bolǵan 40 avtomobıl taǵy bar, olardyń bárin kólikqumar, óz isin súıetin jigitter qaıta qalpyna keltirip shyqty, – deıdi Qonaev qalasyndaǵy erekshe avtosalonnyń ıesi.
Almaty oblysy