Álem chempıonatynyń júldegerleri mingen ushaq Astana halyqaralyq áýejaıyna qondy, dep habarlaıdy Egemen.kz qala ákimdiginiń resmı saıtyna silteme jasap.
El namysyn qorǵaǵan Qazaqstannyń para-hokkeı qurama komanda múshelerin jankúıerleri, týǵan týysqandary, dostary, sol sııaqty Astana qalasynyń Dene shynyqtyrý jáne sport basqarmasynyń basshysy Samat Jylqybaev jáne sport salasynyń birqatar basshylary áýejaıdan úlken qoshemetpen kútip aldy.
Án-kúımen qarsy alǵan ónerpazdar men jankúıerlerine komanda músheleri alǵystaryn bildirdi.
«Osyndaı qurmet kórsetip, áýejaıdan ystyq yqylaspen qarsy alýǵa kelgen barsha jankúıerlerimizge, qalalyq sport basqarmasyna alǵysymyz sheksiz. О́te qýanyshtymyz. Qazirgi kóńil-kúıimdi sózben jetkize almaımyn. Bizge qoldaý kórsetip, biz úshin taqym qysqan barsha aǵaıynǵa raqmet! Jankúıerlerdiń senim údesinen shyǵa alǵanymyz – úlken baqyt», deıdi Astana qalasy para-hokkeı federasııasynyń basshysy ári komanda múshesi Qaırat Sabırov.
Aıta keteıik, 6-11 jeltoqsan aralyǵynda Taıland eliniń Bongkog qalasynda para-hokkeıden álem chempıonaty ótken bolatyn. Týrnırge Qazaqstan, Taıland, Avstrııa, Ulybrıtanııa jáne Fransııa komandalary qatysty.
Otandyq para-sportshylar úshin bul joǵary halyqaralyq deńgeıdegi alǵashqy jarys. Debıýttik týrnırde sportshylar tórt matchta úsh ret jeńiske jetip (7:0, 10:0 jáne 9:2), tek Ulybrıtanııa komandasyna (0:6) ese jiberip qoıdy.
Osylaısha qatarynan úsh komandany oısyrata jeńgen jerlesterimiz para-hokkeıden (sledj-hokkeı) S pýlyndaǵy álem chempıonatynda ekinshi orynǵa taban tirep, álem chempıonatynyń kúmis júldegeri atandy.
Qalalyq para-hokkeı federasııasynyń málimetinshe Astana qalasy para-hokkeı federasııasy 2021 jyly qurylǵan. Komanda qatarynda 18 adam, onyń ishinde bir qyz jáne eki jattyqtyrýshy bar.
«Federasııamyzdyń bastamashylary – múmkindigi shekteýli, tirek-qımyl apparaty buzylǵan azamattar. Maqsatymyz – aıaq ampýtasııasy nemese kez kelgen basqa dıagnozy bar, ómirlik qıyn jaǵdaıǵa tap bolǵan adamdarǵa kómektesý. Mysaly sportshylar arasynda aıaǵynan aıyrylǵan kásibı fýtbolshylar bar. Para-hokkeıge kelip, jańa ómirdi bastap, úmitke qol jetkizdi deýge bolady. Eń jasy – 17-de, úlkeni – 57 jasta. Erekshe qajettilikteri bar adamdarǵa arnalǵan jalǵyz muz saraıy Astanada «Tarlan» sport kesheninde ornalasqan. Qazirgi ýaqytta biz sol jerde oqý jattyǵý jıyndaryn ótkizemiz», dedi Astana qalasy para-hokkeı federasııasynyń basshysy Qaırat Sabırov.
Jarys sońynda paralımpıada oıyndarynyń chempıonatyn uıymdastyrýshylar qazaqstandyq quramanyń oıynyna tánti bolyp, 2-oryn alǵanyna qaramastan, 2023 jyly V tobynda ótetin kelesi chempıonatta óner kórsetýine joldama berdi.