Fýtboldan Qatarda ótip jatqan teńbil dop merekesi de óz máresine taıap qaldy. Sársenbiden beısenbige qaraǵan túni jartylaı fınaldyń ekinshi matchynda qazirgi álem chempıony – Fransııa osy birinshiliktiń basty sensasııasyn jasaǵan Marokko fýtbolshylaryn jeńdi. Chempıonattyń shymyldyǵy túrilgen «Ál-Baıt» stadıonyndaǵy básekede «úsh jolaqty» eldiń fýtbolshylary Marokkony 2:0 esebimen tize búktirip, qatarynan ekinshi márte álemdik dop dodasynyń fınalyna shyqty.
Qatardyń Ál-Haýr qalasyndaǵy 70 myń jankúıer syıatyn «Ál-Baıt» stadıonynda bıylǵy álem birinshiliginiń toǵyz matchy ótedi dep josparlanǵan bolatyn. Iаǵnı toptyq kezeńniń – alty, shırek fınaldyń – eki jáne jartylaı fınaldyń bir oıyny uıymdastyryldy. Fransııa men Marokko quramasy jartylaı fınalǵa deıin bul alańda bir-bir match ótkizip úlgergen edi. Máselen, 23 qarashada Marokko toptyq kezeńniń birinshi týrynda Horvatııamen kezdesip, 0:0 esebimen teń tarqassa, Fransııa 10 jeltoqsandaǵy shırek fınalda Anglııany 2:1 nátıjesimen tize búktirgen-di. Araǵa tórt kún salyp «Ál-Baıt» stadıonyna qaıta oralǵan fransýzdar qatarynan ekinshi oıynynda da jeńis toıyn toılady.
Tarıhqa kóz júgirter bolsaq, Fransııa men Marokko fýtbolshylary buǵan deıin ózara bes márte jolyqqan eken. Tórt márte joldastyq kezdesý ótkizse, bir ret halyqaralyq týrnırde joldary túıisken. Qos qurama alǵash ret 1988 jyly uıymdastyrylǵan «Fransııa týrnıri» básekesiniń fınalynda kezdesip, birinshi match jarys qojaıyndarynyń jeńisimen aıaqtalǵan – 2:1. Al keıingi tórt joldastyq kezdesýdiń ekeýinde Fransııa fýtbolshylarynyń mereıi ústem bolsa, eki match teń eseppen aıaqtalǵan. 2007 jyly ótken ázirshe eń sońǵy joldastyq kezdesýde quramalar 2:2 nátıjesimen teń túsken.
Jartylaı fınal básekesi aldyndaǵy baspasóz máslıhatynda Fransııa quramasynyń bas bapkeri Dıde Desham negizgi quramnyń eki oıynshysy syrqatyna baılanysty Marokkomen ótetin matchqa qatysa almaıtynyn málimdedi. 24 jastaǵy «Bavarııanyń» qorǵaýshysy Deotshankıýl Ýpamekano oıyn hattamasyna engenimen, alańǵa shyqqan joq. Al 27 jastaǵy «Iýventýstiń» jartylaı qorǵaýshysy Adrıan Rabo da bul oıynda komandasyna kómektese almady. Marokko quramasynyń bas jattyqtyrýshysy Valıd Regragı bolsa, táýekelge bel býyp, Portýgalııamen bolǵan oıynda jaraqat alǵan negizgi quramnyń oıynshylaryn da alańǵa shyǵardy. Tipti sol matchta aýyr jaraqat alǵan kapıtan Romen Saıssti de birinshi mınýttan oıynǵa qosty.
Álem chempıonatyndaǵy bes oıynda qaqpasyna birde-bir gol ótkizbegen Marokko (bir goldy óz qaqpalaryna soǵyp alǵany bolmasa), bul matchta da ádettegideı qorǵanysqa basa nazar aýdaryp, matchty penaltı serııasyna deıin jetkizýdi kózdegeni anyq baıqaldy. Biraq fransııalyq fýtbolshylar Ispanııa, Portýgalııa quramalary jibergen qatelikti qaıtalamaýǵa tyrysyp, birinshi mınýttan bastap qarsylasynyń qorǵanysyn buzyp-jarýǵa umtyldy. Nátıjesi de kóp kúttirgen joq. Matchtyń besinshi mınýtynda Antýan Grızmann asyrǵan pasqa birinshi jetken Kılıan Mbappe chempıonattaǵy altynshy golyn soǵatyn múmkindikti jiberip alǵanymen, qaqpa mańyndaǵy qarbalas sátte Teo Ernandes alynbas qamalǵa aınalǵan Iаssın Býnýdyń qaqpasynan sańylaý tapty.
Marokkolyq fýtbolshylar jyldam gol ótkizip alǵan soń, aqyryndap shabýylǵa shyǵa bastady. Buǵan deıingi matchtarda tek qarymta shabýylǵa ıek artqan Afrıka qurlyǵynyń ókilderine bul joly ózderi shabýyl uıymdastyrýǵa týra keldi. Sondaı sátterdiń birinde Azzedın Ýnaı men Djavad ál Iаmık tarazy basyn teńestirip qana qoımaı, quramasyn esepte alǵa shyǵaratyn jap-jaqsy múmkindikke ıe bolǵan edi. Alaıda Fransııa quramasy sapyndaǵy tájirıbeli qaqpashy Ýgo Lorıs bul kezdesýde de shapshańdyǵymen kózge tústi.
Nebári eki-aq álem chempıonatynda 11 gol soǵyp, «qaqpashylardyń kılleri» atanǵan Kılıan Mbappege bul matchta gol soǵý baqyty buıyrmasa da, áriptesterine nátıjeli pas berýmen kózge tústi. Matchtyń 79-mınýtynda Mbappe kezekti bir qarsy shabýylda jeke sheberliginiń arqasynda birneshe fýtbolshyny aldap ótip, mańyzdy sátte dopty áriptesi Randal Kolo Mýanıge asyryp, Fransııanyń fınalǵa shyǵýyna zor úlesin qosty – 2:0.
Osylaısha, toptyq kezeńnen bastap, jartylaı fınalǵa deıin eýropalyq dańqty quramalardy jarys jolynan yǵystyryp, óz tarıhynda tuńǵysh ret álem chempıonatynyń jartylaı fınalyna deıin jetken Marokkonyń Qatardaǵy «ertegisi» óz máresine jetti.
Endi 17 jeltoqsan kúni F tobynyń qos quramasy – Horvatııa men Marokko Dohadaǵy Halıfa halyqaralyq stadıonynda álem chempıonatynyń úshinshi ornyn sarapqa salsa, ertesi kúni (18 jeltoqsan) Lýsaıldaǵy stadıonda Argentına men Fransııa bas júldege talasady. Bir aıta keterligi, Argentına bul stadıonda búginge deıin tórt match ótkizip, sonyń úsheýinde jeńiske jetken. Tek Saýd Arabııasymen bolǵan birinshi oıynda ǵana jeńiliske ushyraǵan edi. Al Fransııa fýtbolshylary bul alańda birinshi ret match ótkizbek.