Horvatııa ulttyq quramasy Qatarda ótip jatqan fýtboldan álem chempıonatynyń qola júldegeri atandy. Osydan tórt jyl buryn Reseıde uıymdastyrylǵan teńbil dop dodasynda Fransııadan jeńilip, kúmis júldege ıe bolǵan Zlatko Dalıch shákirtteri bul joly úshinshi orynǵa ıe boldy. 45 myńnan asa jankúıer syıatyn Dohadaǵy «Halıfa» stadıonynda ótken tartysty básekede Horvatııa fýtbolshylary Marokkony 2:1 esebimen tize búktirdi.
Jartylaı fınalda Argentına men Fransııadan jeńilip, sátsizdikke ushyraǵan eki quramanyń da úshinshi oryn úshin ótetin match aldynda qaı jaǵynan alyp qarasaq ta, kúshteri teń edi. Máselen, Horvatııa men Marokko fýtbolshylary buǵan deıin jasyl alańda eki márte kezdesip, ekeýi de teń eseppen aıaqtalǵan bolatyn. 1996 jyly Kasablankada ótken joldastyq básekede 2:2 esebi tirkelgen bolsa, osy álem chempıonatynyń toptyq kezeńdegi ekinshi kezdesýinde de jeńimpaz qurama anyqtalǵan joq – 0:0. Sondaı-aq basqa da statıstıkalyq málimetter eki quramanyń bir deńgeıdegi komanda ekenin aıǵaqtaıdy.
Álemdik mýndıaldaǵy tájirıbe, júldeler sany, reıtıngtegi quramalardyń orny «shaqpaq jeıdelilerdiń» afrıkalyqtarǵa qaraǵanda báribir bir saty joǵary turǵanyn dáleldeıdi. Atap aıtqanda, 2018 jylǵy «Altyn dop» ıegeri Lýka Modrıch bastaǵan Horvatııa quramasy Qatardaǵy álem birinshiligine deıingi FIFA reıtınginde 12-orynda turǵan bolsa, Marokko 22-satyǵa jaıǵasqan. Sonymen qatar Horvatııa 1998 jyly Fransııada ótken álemdik fýtbol básekesiniń qola júldesin, 2018 jylǵy Reseıdegi jahandyq birinshilikte kúmis júldege qol jetkizgen. Al Marokko bolsa, buǵan deıin bes álem chempıonatyna qatysqanymen, tek bir ret qana, ıaǵnı 1986 jyly Meksıkada uıymdastyrylǵan fýtbol toıynda 1/8 fınal mejesinen kóringen bolatyn.
«Halıfa» stadıonynda ótken oıynǵa toqtalar bolsaq, eki quramanyń toptyq kezeńdegi alǵashqy oıynynda birde-bir gol soǵylmaǵandyqtan, fýtbol sarapshylary match aldynda bul básekede kóp gol kóremiz dep boljaǵan edi. Aýzy dýaly mamandardyń aıtqany aıdaı keldi. 90 mınýtqa jalǵasqan matchta jankúıerler biri birinen ótken ádemi úsh goldyń kýási boldy.
Úsh upaı emes, júldeli úshinshi oryn úshin ótken matchtyń jóni bólek bolǵan soń, eski de jańa qarsylastar birinshi mınýttan bastap ańdysyp jatqan joq. Tóreshiniń ysqyryǵy estilgen sátten bastap eki quramanyń fýtbolshylary da alǵa umtylyp, birinshi bolyp gol soǵýǵa tyrysty. Sondyqtan stadıonǵa jınalǵan, teledıdar arqyly tamashalaǵan jankúıerler birinshi goldyń soǵylǵanyn kóp kútken joq. Kezdesýdiń jetinshi mınýtynda Ivan Perıshıchtiń pasynan keıin Horvatııanyń uzyn boıly qorǵaýshysy Ioshko Gvardıol baspen gol soǵyp, matchtyń esebin ashty – 1:0. Biraq horvatııalyq jankúıerlerdiń qýanyshy uzaqqa sozylǵan joq. Arada eki mınýt ótkende Marokko quramasynyń qorǵaýshysy Ashraf Darı mergendik tanytyp, tarazy basyn teńestirdi – 1:1.
Jyldam eki gol soǵylǵannan keıin oıyn biraz saıabyrsyǵandaı boldy. Alaıda birinshi taım aıaqtalar tusta Marokko quramasynyń qorǵanystaǵy qateliginen keıin horvatııalyq fýtbolshy Mıslav Orshıchtiń aıyp alańynyń sol qaptalynan qaqyrata tepken dobyn mýndıaldyń eń úzdik qaqpashylarynyń biri Iаssın Býný qaıtara almady – 2:1. Ekinshi taımda Marokko fýtbolshylary tarazy basyn teńestirýge qansha tyrysqanymen, Sýfıan Býffal, Iýssefa En-Nesırı, Hakım Zıesh sekildi fýtbolshylar Domınık Lıvakovıchtiń qaqpasynan sańylaý taba almady.
Osylaısha, Qatardaǵy álem chempıonatynyń úshinshi oryn úshin ótken matchynda Zlatko Dalıch jetekshilik etetin Horvatııa quramasy jeńiske jetti. Sóıtip, horvattar 24 jyl burynǵy Fransııadaǵy tarıhı nátıjesin qaıtalap, álem birinshiliginiń eki dúrkin qola júldegeri atandy.