Búgingi tańda gemangıomasy bar 86 bala tegin dári-dármek pen lazerlik em alýda. Bul emdeý ádisi isikpen hırýrgııalyq aralasýsyz kúresýge múmkindik beredi, dep habarlaıdy Egemen.kz Qazaqstan halqyna qoryna silteme jasap.
Tamyrly patologııasy bar balalar sanynyń ósýine baılanysty emdeý isin júrgizý Qazaqstanda da, búkil álemde de ózekti. Osyǵan baılanysty, Qazaqstan halqyna qory qan tamyrly patologııasy bar balalarǵa medısınalyq kómek kórsetý boıynsha qaıyrymdylyq baǵdarlamasyn iske asyryp jatyr. Tıisti emdeý qajetti jabdyqtar men osy saladaǵy bilikti mamandarǵa baılanysty.
Baǵdarlama aıasynda halyqtyń áleýmettik osal toptarynan gemangıoma dıagnozy qoıylǵan 18 jasqa deıingi balalarǵa (múgedek balalar; kóp balaly, az qamtylǵan, tolyq emes otbasylardan shyqqan balalar; múgedek balalardy tárbıelep otyrǵan otbasylardan shyqqan balalar; ata-analarynyń birinde múgedektigi bar balalar) dári-dármek berilip, lazerlik emdeý qoldanylýda. Baǵdarlamany júzege asyrý maqsatynda 20,4 mln teńge bólindi.
Qazirgi ýaqytta em qabyldap jatqan 4 jasar Jánibek Shymkent qalasynda turady. Ol anasymen birge qazan aıynyń sońynda qorǵa júgingen. Al jaqynda klınıkaǵa qaralýǵa shaqyryldy.
«Aıaǵy men taban jaǵynda paıda bolǵanynda, ony gematoma dep oıladyq. О́zdiginen ketip qalady dedik. Balanyń ósýine qaraı isik kólemi de ulǵaıdy. Munda kelmes buryn Máskeýge emdelýge eki ret bardyq. О́zgeris bar, biraq áli de emdelý kerek. Jánibek – batyr jigit, qanshama em aldyq, bárinen jaqsy ótip keledi», deıdi Jánibektiń anasy Marjan.
Al astanalyq 3 jasar Sábına osymen úshinshi ret em alyp jatyr. Birneshe prosedýradan keıin oń ózgerister baıqalýda.
«Qyzym gemangıomamen dúnıege keldi. Jergilikti mamandar alty aı kúte turyńyz, osy ýaqyt ishinde isik ulǵaıýy múmkin nemese ketip qalýy múmkin dedi. Biraq, ósip otyrdy. Sondyqtan biz «Qazaqstan halqyna» qoryna júginip, kómek alýdamyz. Osymen úshinshi aıda emdelip jatyrmyz. Eger buryn aıaǵynda úlken qyzyl daq bolsa, lazerden keıin aqshyldana tústi. Nátıjesi bar», dedi Sábınanyń anasy Gúlzat.
Aıta ketsek, qabyldaý men emdeý sharalary qordyń seriktesi – A.Qarabekov atyndaǵy QQ áleýmettik medısınalyq ortalyǵynda júrgiziledi. Ortalyq dırektory jáne pedıatr Roza Qarabekovanyń aıtýynsha, klınıkaǵa kelgen naýqastardyń 80%-ynda gemangıoma kezdesedi. Qatersiz isik bolǵanymen, jyldam ósý kezinde jáne kútý taktıkasy qoldanylǵan jaǵdaıda aýyr kosmetıkalyq derttiń damýyna ákelýi múmkin.
«Búginde elimizde osy patologııany emdeýmen maqsatty túrde aınalysatyn beıindi mamandar az. О́kinishke qaraı, kútý taktıkasy bar, onyń saldary qıyn jaǵdaıǵa ákep soqtyrýy múmkin. Sonymen qatar zamanaýı lazerlik jabdyqtyń tapshylyǵyn kórip otyrmyz. Ári dertti emdeýdiń biryńǵaı tásili joq. Sondyqtan ár jaǵdaı jeke qaralady, emdeý ýaqyty 6 aıdan 8 aıǵa deıin sozylady. Klınıkamyzda aralas ádisti qoldanamyz. Birinshi kezeńde medısınalyq emdeý blokator preparatyn, atap aıtqanda, kardıologtardyń qatań baqylaýymen atenololdy qoldaný arqyly júzege asyrylady. Ekinshi kezeńde kezeń-kezeńmen lazerlik óńdeýdi qoldanamyz», dep túsindirdi Roza Qarabekova.