Shaǵyn quramdaǵy kezdesýden keıin Qasym-Jomart Toqaev pen Shavkat Mırzııoev eki memlekettiń resmı delegasııalarynyń qatysýymen keńeıtilgen quramda kelissóz júrgizdi, dep habarlaıdy Egemen.kz Aqordanyń resmı saıtyna silteme jasap.
Prezıdentter saýda-ekonomıkalyq yntymaqtastyqty nyǵaıtýǵa, sonyń ishinde ózara taýar aınalymyn ulǵaıtýǵa, ınvestısııa tartýǵa, ónerkásip, farmasevtıka, aýyl sharýashylyǵy, qurylys, tranzıt áleýeti jáne kólik logıstıkasy salalaryndaǵy kooperasııany damytýǵa basa mán berdi. Sondaı-aq bilim berý jáne mádenı-gýmanıtarlyq salalarda ózara is-áreket máselesi de talqylandy.
Memleket basshysy shaǵyn quramda ótken kelissóz nátıjesine joǵary baǵa berip, ekijaqty yntymaqtastyqty dostyq, tatý kórshilik qarym-qatynas jáne ózara qoldaý rýhynda keshendi túrde keńeıtýge nıetti ekenin jetkizdi.
Qasym-Jomart Toqaev elderimiz búginde memleketaralyq seriktestikke úlgi bolatyndaı berik ári úılesimdi qarym-qatynas ornatqanyn atap ótti.
«Odaqtastyq qarym-qatynas týraly shartqa qol qoıý bizdiń memleketaralyq baılanystarymyzdyń joǵary deńgeıde ekenin kórsetedi. Eger biz shartty tarıhı mańyzy bar qujat dep ataıtyn bolsaq, bul asyra aıtqandyq emes dep oılaımyn. Bul asa mańyzdy qujat biz úshin jańa múmkindikterge jol ashady jáne eki eldiń ózara yntymaqtastyqty nyǵaıtýǵa degen ortaq umtylysyn bildiredi. Budan bólek, búgin Qazaqstan men О́zbekstannyń memlekettik shekaralaryn demarkasııalaý týraly shartqa qol qoıylady. Bul tarıhı kelisim Qazaqstannyń ońtústigindegi memlekettik shekarasyn halyqaralyq-quqyqtyq turǵyda rásimdeý isin tolyǵymen aıaqtaıdy», dedi Prezıdent.
Memleket basshysy odaqtastyq qarym-qatynasty nyǵaıtý jolyndaǵy birlesken is-áreketter búkil Ortalyq Azııanyń ornyqty damýy men turaqtylyǵyn qamtamasyz etýge eleýli úles qosatynyn atap ótti.
Sonymen qatar kelissóz barysynda prezıdentter ekijaqty yntymaqtastyqtyń saıası tuǵyrnamasyn bekemdeı túsetin Joǵary memleketaralyq keńes pen Parlamentaralyq keńes qurý jóninde ýaǵdalasty.
Qasym-Jomart Toqaev taraptar túrli halyqaralyq qurylymdar men mehanızmder aıasynda tabysty jumys júrgizip kele jatqanyn aıtty. О́ńirlik jáne halyqaralyq kún tártibindegi kóptegen másele boıynsha Qazaqstan men О́zbekstannyń ustanymdary ortaq, kózqarastary uqsas.
О́z kezeginde Shavkat Mırzııoev shaǵyn quramdaǵy kelissózdiń nátıjeli bolǵanyn atap ótip, taýar aınalymynyń ulǵaıǵanyna jáne birlesken jobalardyń sátti júzege asyrylyp jatqanyna toqtaldy.
«Sizdiń memlekettik saparyńyz bizdiń ǵasyrlar boıy qalyptasqan dostyq, tatý kórshilik jáne ózara qoldaý sıpatyndaǵy baılanystarymyzdyń qanshalyq berik ekenin taǵy naqtylaı túsedi. Bizdiń halyqtarymyzdyń tarıhy men taǵdyry bir-birimen bite qaınasqan. Elderimizdiń tarıhı tamyry ortaq ári biz ózekti máselelerdi birlese sheshemiz», dedi О́zbekstan Prezıdenti.
Sondaı-aq taraptar mádenı-gýmanıtarlyq baılanystardyń damýyna oń baǵa berdi. Eki el halqynyń ortaq rýhanı-mádenı qundylyqtaryn baıyta túsken Qazaqstan men О́zbekstannyń mádenıet kúnderi tabysty ótti. Sondaı-aq elderimizdiń bilim berý salasyndaǵy yntymaqtastyq máselesi de qarastyryldy.