Almatydaǵy Balýan Sholaq atyndaǵy sport saraıynda shahmattyń rapıd jáne blıs túrleri boıynsha kezekti álem chempıonatynyń jalaýy jelbiredi. Elimizde tuńǵysh ret uıymdastyrylyp jatqan oılylar oıynyna erler arasyndaǵy álemdik reıtıngtiń kóshbasshysy norvegııalyq Magnýs Karlsen jáne áıelder arasyndaǵy dańqty shahmatshy Aleksandra Gorıachkınadan bólek, jer-jahannyń ár qıyrynan jınalǵan 250-ge tarta oıynshy qatysyp jatyr.
Chempıonattyń resmı ashylý saltanatyna Mádenıet jáne sport mınıstri Dáýren Abaev, Halyqaralyq shahmat federasııasynyń prezıdenti Arkadıı Dvorkovıch, Almaty qalasynyń ákimi Erbolat Dosaev jáne taǵy basqa jarystyń resmı tulǵalary qatysty. Dáýren Abaev Memleket basshysy Qasym-Jomart Toqaevtyń atynan quttyqtaý sózin oqyp berdi.
Jalpy, 1998 jyldan beri turaqty túrde uıymdastyrylyp kele jatqan shahmatshylardyń álem chempıonatyna qatysý baqyty kez kelgen sportshyǵa buıyra bermeıdi. Sondyqtan uıymdastyrýshylar jyldyń eń mańyzdy týrnırine tek jyl boıy joǵary nátıje kórsetip, óz myqtylyǵyn dáleldegen shahmatshylardy ǵana shaqyrady. Iаǵnı erler arasyndaǵy álem birinshiligine qatysý úshin olardyń álemdik reıtıngtegi upaıy 2550-den az bolmaýy kerek. Al áıelder arasyndaǵy dodaǵa qatysý úshin shahmatshy qyzdarǵa jyl boıy 2250 upaı jınaý qajet bolady.
Alataý baýraıynda alǵash ret ótip jatqan dúbirli dodanyń erler arasyndaǵy básekesinde Magnýs Karlsen (Norvegııa, jeltoqsan aıyndaǵy álem reıtıngindegi upaıy 2859), Hıkara Nakamýra (AQSh, 2768), Fabıana Karýana (AQSh, 2766), Iаn Nepomnıashıı (FIDE, 2793), Anısh Gırı (Nıderland, 2764), Aleksandr Grıshýk (FIDE, 2745), Shahrııar Mamedıarov (Ázerbaıjan, 2740), Iаn-Kshıshtof Dýda (Polsha, 2729), Iýı Iаnıı (Qytaı, 2728) jáne byltyr Polshada ótken álem chempıonatynyń qazirgi chempıony – Maksım Vashe-Lagrav (Fransııa, 2737, Blıs), sonymen qatar basqa da ataqty shahmatshylar synǵa túsip jatyr.
Al áıelder arasynda Aleksandra Gorıachkına (FIDE, 2584), Katerına Lagno (FIDE, 2563), Hampı Konerý (Úndistan, 2572), Tan Jongýı (Qytaı, 2518), Nana Dzagnıdze (Grýzııa, 2517), Harıka Dronavalı (Úndistan, 2507), Jansaıa Ábdimálik (Qazaqstan, 2496), Sarasadat Hamedalshareh (Iran, 2490), Antoaneta Stefanova (Bolgarııa, 2442), qazirgi chempıondar Aleksandra Kosteınıýk (FIDE, 2520 – rapıd) jáne Bıbisara Asaýbaeva (Qazaqstan, 2440) sııaqty dańqty sportshylar jáne de basqa da myqty shahmatshylar oınaıdy.
Bıbisara Asaýbaevadan bólek, bıylǵy álem chempıonatyna Qazaqstan quramasynan Rınat Jumabaev, Jansaıa Ábdimálik (reıtıngte 2496 upaıy bar), Dınara Sádýaqasova, Bıbisara Asaýbaeva (2440 upaı), sonymen qatar Gúlishan Naqbaeva, Qazybek Nógerbek, Ásel Serikbaı syndy 40-tan asa otandasymyz qatysyp jatyr.
Týrnırdi uıymdastyrýshylar – Halyqaralyq shahmat federasııasy (FIDE) men Qazaqstan shahmat federasııasy. Álem birinshiligi Almaty qalasy ákimdiginiń jáne Mádenıet jáne sport mınıstrliginiń qoldaýymen ótkizilip jatyr. Jarystyń jalpy júlde qory – 1 mln AQSh dollaryn qurap otyr.