Elordada Mádenıet jáne sport mınıstrliginiń uıymdastyrýymen «Jeńimpaz rýhy» ulttyq sport syılyǵyn tabystaý rásimi ótti.
Saltanatty kesh barysynda mınıstrlik tarıh qoınaýyna enip bara jatqan 2022 jyldy qorytyndylap, halyqaralyq arenalarda Ánuranymyzdy shyrqatyp, Kók týymyzdy kókte jelbiretken sportshylardy marapattady. Sondaı-aq olardyń bapkerleri men sporttyń san túrli salasynda Qazaq sportynyń órkendeýine óz úlesin qosyp júrgen jandar da syılyqtan quralaqan qalǵan joq. Sonymen qatar Mádenıet jáne sport mınıstriligi sportshylardyń aıtýly jeńisin BAQ arqyly nasıhattap júrgen sport jýrnalısterin de nazardan tys qaldyrǵan joq.
Sonymen, is-sharanyń qorytyndysy boıynsha áıelder kúresinen eki dúrkin Azııa chempıony, álem birinshiliginiń kúmis júldegeri Jámıla Baqbergenova (jazǵy sport túrlerinen) men Beıjiń Paralımpıadasynyń qola medal ıegeri Aleksandr Gerlıs (qysqy sport túrlerinen) «Jyldyń úzdik sportshysy» atansa, olardyń jeke bapkerleri Nursultan Temirov (jazǵy) pen Anton Jdanovıch (qysqy) «Jyldyń úzdik jattyqtyrýshysy» atalymyna ıe boldy. Sondaı-aq Ulttyq konkı tebýshiler federasııasy – «Jyldyń úzdik akkredıttelgen sport federasııasy», Atyraý oblysy «Múgedekterdiń sport uıymy» – «Jyldyń úzdik sport mekemesi», Qaraǵandy oblysynyń Dene shynyqtyrý jáne sport basqarmasy – «Jyldyń úzdik sport óńiri», Dastan Balabekov – «Aýyldaǵy úzdik jattyqtyrýshy», Irına Novıkova men Elena Galıs – «Dene shynyqtyrý jáne sport bóliminiń úzdik mamany», Samat Sapıshev – «Jyldyń úzdik balalar jattyqtyrýshysy», «Qýanysh» voleıbol klýby – «Oıyn túrleri boıynsha úzdik sport komandasy», Bekjan Adambekov – «Aýyldaǵy úzdik dene shynyqtyrý jáne sport bóliminiń ádiskeri», Elena Rybakına – «Jyl jańalyǵy», Qaıyrbek Hamzın – «Jyldyń úzdik mesenaty» jáne Alan Qurmanǵalıev (ústel tennısi), Evgenıı Fedorov (velosport), Marııa Brovkova (kanoede eskek esý) – «Jastar men jasóspirimder arasyndaǵy úzdik sportshy» dep tanyldy.
Al jyldyń eń úzdik sport jýrnalısine beriletin «Seıdahmet Berdiqulov atyndaǵy úzdik sport jýrnalısi» atalymy boıynsha «Egemen Qazaqstan» tilshisi Ǵalym Súleımen úzdik shyqty. Sondaı-aq Aslan Qajenov (Úzdik televızııalyq reportaj) pen Bek Tóleýov (Úzdik jarııalanym) te júldegerler qatarynan kórindi.
Aıta keteıik, jeńimpazdar Mádenıet jáne sport mınıstrligi tarapynan bir mıllıon teńge kóleminde qarjylaı syıaqymen marapattaldy.