Elordalyq áýe aılaǵy óziniń tarıhynda tuńǵysh ret bir jyldyń ishinde alty mıllıon jolaýshyǵa qyzmet kórsetti. Bul – rekordtyq kórsetkish, dep habarlaıdy Egemen.kz.
Búgin Nursultan Nazarbaev halyqaralyq áýejaıyna Aqtaý qalasynan kezekti reıs ushyp keldi. Atalǵan reıstiń jolaýshylaryn aeroport ókilderi saltanatty túrde qarsy alyp, lototron kómegimen jeńimpazdy anyqtady. Jolaýshynyń esimi Tanzılıa Joldybaeva, Aqtaý qalasynyń turǵyny. Alty mıllıonynshy jolaýshyǵa Air Astana kompanııasy áýejaı ákimshiligimen birlesip elorda áýejaıynan kez kelgen halyqaralyq baǵyt boıynsha eki bılet tabys etti. Is-sharaǵa «Nursultan Nazarbaev halyqaralyq áýejaıy» AQ Basqarma tóraǵasy Dáýlet Hamzın, IIDM Azamattyq avıasııa komıtetiniń tóraǵasy Talǵat Lastaev jáne «Qazaqstannyń avıasııalyq ákimshiligi» AQ Bas dırektorynyń orynbasary Saltanat Tompıeva qatysty.
Aıta keterligi, bıyl jeltoqsan aıynda elordalyq áýe aılaǵy 550 myńǵa jýyq jolaýshyǵa qyzmet kórsetken. Bul ótken jyldyń sáıkes kezeńimen salystyrǵanda 23%-ǵa artyq. Elorda áýejaıy baspasóz qyzmetiniń málimetinshe, osy jyly birqatar kórsetkish boıynsha oń dınamıka baıqalady.
Áýejaı ókilderi sondaı-aq qarasha aıynda tanystyrylǵan bas jospar týraly da aıtyp berdi. Ol jer ýchaskelerin kezeń-kezeńmen josparlaý jáne paıdalanýdy, jańa ınfraqurylym obektileriniń qurylysyn qamtıdy. Jalpy áýejaı jumysynyń basym baǵyttarynyń biri – júk ınfraqurylymyn damytý jáne termınaldar jelisin keńeıtý.
«Jyl sońyndaǵy oń kórsetkishter jumysty odan ári jaqsartýǵa serpin beredi. Máselen, jolaýshylar aǵynynyń ulǵaıýy óz kezeginde termınaldardy keńeıtýdi talap etedi. Al bul sharalar bas jospardy iske asyrý sheńberinde kózdelgenin aıta ketken jón. Sondaı-aq bıyl Fast track qyzmeti engizildi, ol tirkeý jáne tekserý úrdisterinen jyldam ótýge múmkindik beretin jańa qyzmet túri», dedi «Nursultan Nazarbaev halyqaralyq áýejaıy» AQ Basqarma tóraǵasy.
Áýe tasymaly qarqyndylyǵynyń artýyna jáne elorda áýejaıyn damytý jónindegi josparlaryna baılanysty kásiporyn menedjmenti áýeaılaq ýchaskesin qaıta qurý qajettiligi týraly aıtady. Osy rette Astana áýejaıy ekinshi ushý-qoný jolaǵyn salýdy josparlap otyr.
«Pandemııa kezindegi oryn alǵan qıyndyqtar Astana áýejaıyn jańa tabys kózderin izdeýge jáne damytýǵa ıtermeledi. Atap aıtqanda, áýe aılaǵyn mýltımodaldy júk tasymaldaý jáne E-commerce qyzmet kórsetý ortalyqtary men avıapersonaldy daıarlaý jónindegi oqý ortalyǵy bar kópfýnksıonaldy kásiporynǵa aınaldyrýdy kózdeıtin damytý Tujyrymdamasy ázirlendi», dep atap ótti áýejaı basshysy D.Hamzın.
Búgingi tańda ishki jáne halyqaralyq reıster qalpyna keltirilgen. Sondaı-aq Indýstrııa jáne ınfraqurylymdyq damý mınıstrligi men azamattyq avıasııa komıtetiniń qoldaýymen jańa baǵyttardy ashý boıynsha jumystar jalǵasyp jatyr. Áýejaı kirisi 5 jyldyń ishinde alǵash ret oń nátıjelerdi kórsetip otyr. Atap aıtqanda, qyzmetkerlerdiń jalaqylary ósip, toqsandyq syılyqaqylar tólenip keledi. Sonymen qatar bıyl jolaýshylar aǵyny, júk tasymaldaý kólemi edáýir artyp, halyqaralyq jáne ishki baǵyttar boıynsha reıster sany ulǵaıa tústi.
Esterińizge sala keteıik, Nursultan Nazarbaev halyqaralyq áýejaıy World Airport Awards-ta Ortalyq Azııadaǵy/TMD-daǵy úzdik óńirlik áýejaı bolyp tanyldy. Marapat 2022 jylǵy 16 maýsymda Parıjdegi EKSPO jolaýshylar termınalynda tabystalǵan bolatyn.