Memleket basshysy Qasym-Jomart Toqaev Ishki ister mınıstri Marat Ahmetjanovtyń baıandamasyn tyńdady, dep habarlaıdy Egemen.kz Aqordaǵa silteme jasap.
«Quqyqbuzýshylyqtardyń aldyn alý úshin qabyldanyp jatqan sharalar elimizde kisi óltirý qylmystarynyń sanyn aıtarlyqtaı azaıtýǵa yqpal etti. Sondaı-aq urlyqqa jáne mal urlyǵyna qatysty qylmystardy ashý jumystary kúsheıtildi. Uıymdasqan qylmystyń shyǵý sebepteri men qarjylandyrý kózderin joıýǵa basymdyq bere otyryp, olarǵa qarsy kúres tásilderin ózgertý nátıjesinde uıymdasqan qylmystyq toptardyń 24 basshysy men 114 múshesi tutqyndaldy», dedi Marat Ahmetjanov.
Mınıstrdiń aıtýynsha, ınternet-alaıaqtyqqa qarsy is-áreket jónindegi keshendi sharalardy júzege asyrý barysynda uıaly baılanys kompanııalary «aýyspaly» nómirlerden shalynǵan 5,5 mıllıon qońyraýdy buǵattaǵan.
Mınıstrlik 6 uıymdasqan qylmystyq topty joıyp, alaıaqtyq belgileri bar 165 saıttyń jumysyn toqtatty.
Sonymen qatar Ishki ister mınıstrligi basqa quqyq qorǵaý jáne arnaýly organdarmen birlesip, 2781 esirtki qylmysyn anyqtady. Zańsyz aınalymnan 15 tonnadan astam esirtki tárkilenip, 70 esirtki zerthanasy joıyldy, esirtki jarnamalaıtyn 1990 saıt buǵattaldy.
Kezdesý sońynda Memleket basshysy turmystyq zorlyq-zombylyqtyń, ınternet-alaıaqtyqtyń, aýyldyq jerlerdegi qylmystyń kez kelgen kórinisi boıynsha aldyn alý sharalaryn qabyldaýdyń jáne jedel áreket etýdiń mańyzdy ekenin atap ótti. Prezıdent bul baǵytta uıymdastyrý jumystaryn júrgizip, zańnamalyq sharalar qabyldaýdy tapsyrdy. Sondaı-aq Qasym-Jomart Toqaev vedomstvo basshysyna elimizde jol qaýipsizdigi men quqyqtyq tártipti qamtamasyz etý jóninde birqatar mindet júktedi.