«Astananyń» qarsylastary anyqtaldy

Bıylǵy «Týr de Frans» velo­báıgesine uzyn-sany 22 ve­lo­komandanyń ókilderi qaty­satyn boldy. Olardyń ishinde 18-i jyl saıyn álemdik iri týrlarda óner kórsetip júrgen velo­klýbtar bolsa, ekeýi kásibı qurlyqtyq deńgeıdegi komandalar. Olar – Izraıldiń «Israel-Premier Tech» velokomandasy men norvegııalyq «Uno-X Pro Cycling Team» ujy­my. «Týr de Franstyń» byltyrǵy maýsymynda «Israel-Premier Tech» velokomandasynyń ókilderi eki kezeńde jeńiske jetti. Atap aıtqanda, aýstralııalyq veloshabandoz Saımon Klark 157 shaqyrymǵa sozylǵan besinshi kezeńde máre syzyǵyn birinshi bolyp kesse, 2018-2021 jyldar aralyǵynda «Astana» sapynda baq synaǵan 32 jastaǵy ka­nadalyq sportshy Ýgo Ýl 16-kezeńde úzdik shyqqan bo­latyn. Sondaı-aq 2022 jylǵy maý­symnyń qorytyndysy bo­ıyn­sha eń kóp upaı jınaǵan bel­gııalyq «Lotto Dstny» jáne fransııalyq «TotalEnergie» komandalary uıymdastyrýshylar tarapynan arnaıy shaqyrtý aldy.

Sóıtip, shildeniń 1-23 araly­ǵynda ótetin «Týr de Frans – 2023» jarysyna «Astana Qazaq­­stan Team» velokomandasynan bólek, osy dodanyń turaq­ty qatysýshylary fran­sııalyq «AG2R Citroën Team», «Team Arkea-Samsic», «Team Co­fidis» jáne «Groupama-FDJ», belgııalyq «Alpecin De­­ceuninck», «Soudal Quick-Step» jáne «Intermarché-Circus-Wan­ty», sonymen qatar ger­ma­nııalyq «Bora-Hansgrohe», ame­rıkalyq «EF Education-Easy­post» pen «Trek-Segafredo», uly­brıtanııalyq «Ineos Grenadiers», nıderlandtyq «Team DSM» jáne «Jumbo-Visma», keıingi 10 jylda alty ret «Týr de Frans­tyń» úzdik velokomandasy atanǵan ıspanııalyq «Mo­vistar Team», 2021 jylǵy úzdik ujym bahreındik «Team Bahrain Victorious», aýstrııalyq «Team Jay­co AlUla» jáne Birikken Arab Ámirlikteriniń «UAE Team Emi­rates» komandalary jarys kóri­gin qyzdyrmaq.

Jalpy alǵanda, bıyl Fran­sııa tas joldarynda 110 már­te ótkeli turǵan «Týr de Frans» jarysy 1 shilde kúni Ispanııanyń soltústiginde ornalasqan Bıl­bao qalasynan bastalyp, 23 shil­dede ádettegideı Parıjdiń Elı­seı alańynda óz máresine jetedi. Bir aıta keterligi, 1992 jyldan keıin tarıhta ekin­shi ret áıgili velojarys Bask elinen bastalǵaly tur. Jal­py «Týr de Franstyń» uıym­dastyrýshylary jyl saıyn ja­rystyń aıasyn keńeıtý úshin alǵashqy kezeńderdi Eýro­panyń ártúrli elderinen bastaı­dy. Máselen, byltyrǵy jarys­tyń tusaýy Danııanyń bas shaha­ry – Kopengagende kesilse, kele­si jylǵy básekeniń alaýy Ita­lııada tutanady dep jospar­lanǵan.

21 kezeńnen turatyn 3404 shaqyrym tas joldy velosportshylar úsh aptanyń ishinde júrip ótýge tıis. Sonyń ishinde alty kezeń jazyq, alty kezeń jartylaı taýly, segiz kezeń taý­ly aımaqtaǵy tas joldarda óte­di. Bıyl sprınterler tek bir ǵana jekeleı kezeńde syn­ǵa túsedi. Ol ekinshi demalys kúni­nen keıingi 16-kezeńge jos­parlanǵan.

Byltyrǵy dodada «Astana» velokomandasynyń ókilderi jan­kúıerlerin jarqyn jeńis­te­rimen qýanta almady. 2020 jylǵy dúbirli dodanyń altyn­shy kezeńinde top jarǵan Alek­seı Lýsenko byltyr birde-bir kezeńde úzdik shyǵa alma­dy. Tek úsh kezeńde ǵana TOP-10 velo­shabandozdyń qata­rynan kórinip, jalpy esepte toǵyzynshy orynǵa taban tiredi. Komandalyq saıysta «As­tana» 22 veloklýbtyń ishinde 10-satyǵa jaıǵasty. Al bas júldeni Nıderlandtyń «Jumbo-Visma» komandasynyń namysyn qorǵaıtyn 25 jastaǵy danııalyq veloshabandoz Ionas Vıngegor oljalady.

Sondaı-aq «VeloLIVE» ba­sy­­lymy 5-12 naýryz araly­ǵynda Fransııa tas joldarynda uıymdastyrylatyn dástúrli Parıj – Nıssa kópkúndigine qatysatyn komandalardyń tizi­min jarııalady. Segiz kezeń­nen turatyn bul jarysqa da álem­­niń 22 veloklýby qaty­sady. Atap aıtqanda, «Astana Qazaqstan Team», «AG2R Citroën Team», «Groupama-FDJ», «Team Arkea-Samsic», «Team Co­fidis» (Fransııa), «Alpecin Deceuninck», «Intermarché-Cir­cus-Wanty», «So­u­­­­­­dal Quick-Step» (Belgııa), «EF Education-Easypost», «Trek-Se­­gafredo» (AQSh), «Jumbo-Visma», «Team DSM» (Nı­derland), «Bora-Hansgrohe» (Germanııa), «Ineos Gre­nadiers» (Ulybrıtanııa), «Movistar Team» (Ispanııa), «Team Bahrain Victorious» (Bahreın), «Team Jayco AlUla» (Aýs­tralııa), «UAE Team Emi­rates» (BAÁ) jáne ar­­naıy shaqyrtý alǵan «Lotto Dstny» (Belgııa), «TotalEnergie» (Fran­­sııa), «Israel-Premier Tech» (Izraıl), «Uno-X Pro Cycling Team» (Norvegııa) komandalary bar.

Aıta keteıik, velosporttyń 2023 jylǵy maýsymy 17-22 qań­­tar aralyǵynda Aýstra­lııa­­daǵy «Daýn Ander» velo­kóp­­kúndigimen bastalyp, 17 qa­zanda Qytaıdaǵy «Gýansı tý­­rymen» óz máresine jetedi. Al jyldyń eń iri Grand-týry sanalatyn «Djı­ro d’Italııa» jarysy mamyrda, «Ispanııa Výel­tasy» qyrkúıekte ótedi dep belgilengen.