Shahmattan 2023 jylǵy álem chempıony táji úshin ótetin match sáýir aıynyń 7-30 aralyǵynda uıymdastyrylatyn boldy. Bul týraly Halyqaralyq shahmat federasııasynyń (FIDE) resmı saıty málimdedi. Dese de ázirge dástúrli jarystyń qaı elde ótetini belgisiz. Belgilisi, chempıondyq tájdi 32 jastaǵy reseılik grossmeıster Iаn Nepomnıashıı men 30 jastaǵy qytaılyq shahmatshy Dın Lıjen ekeýi sarapqa salady.
Áýelde chempıondyq táj úshin 2022 jylǵy jeńimpaz norvegııalyq dańqty grossmeıster Magnýs Karlsen men byltyrǵy úmitkerler týrnıriniń úzdigi reseılik Iаn Nepomnıashıı synǵa túsýge tıis edi. Alaıda norvegııalyq shahmatshy bıyl chempıondyq ataǵyn qorǵaýdan bas tartty. Sóıtip Halyqaralyq shahmat federasııasynyń erejesine sáıkes, sportshy álem chempıony ataǵyn qorǵaýdan bas tartqan jaǵdaıda, onyń ornyna úmitkerler básekesinde ekinshi orynǵa ıe bolǵan shahmatshy shyǵady. Al byltyrǵy básekede qytaılyq grossmeıster Dın Lıjen Nepomnıashııden keıingi orynǵa jaıǵasqan bolatyn.
Magnýs Karlsen 2021 jyldyń jeltoqsanynda chempıondyq tájdi ózinde saqtap qalýǵa motıvasııasy bolmaǵandyqtan, 2023 jyly chempıondyq ataǵynan bas tartýy múmkin ekenin aıtqan edi. Degenmen, ol tek 2021 jyldyń qorytyndysy boıynsha 18 jasynda álemdik reıtıngte ekinshi orynǵa jaıǵasqan fransııalyq shahmatshy Alıreza Fırýzdja qarsylas atanǵan jaǵdaıda ǵana chempıondyq táj úshin kúresetinin málimdegen bolatyn. Karlsenniń ókinishine qaraı, Alıreza Fırýzdja byltyrǵy úmitkerler týrnırine qatysqanymen, úzdikter qatarynan kórine almady. Sodan keıin, ıaǵnı 2022 jyldyń shildesinde norvegııalyq grossmeıster Iаn Nepomnıashıımen shahmat taqtasynda oınaýdan bas tartatynyn resmı túrde jarııalady.
Byltyr Alataý baýraıynda uıymdastyrylǵan shahmattan álem chempıonatynyń rapıd jáne blıs túri boıynsha qarsylas shaq keltirmeı, jeńimpaz atanǵan 32 jastaǵy Magnýs Karlsen alǵash ret 2013 jyly shahmattan álem tájin ıelengen bolatyn. Sol jyly úmitkerler básekesinde úzdik shyǵyp, chempıondyq tájdi 2007-2013 jyldar aralyǵynda álemniń 15 dúrkin chempıony atanǵan úndistandyq Vıshvanatan Anandtan «tartyp» aldy. 2014 jyly Mangýs Vıshvanatan Anandty taǵy da jeńip, chempıondyq ataǵyn qorǵap qalǵan. 2016 jyly ol reseılik Sergeı Karıakındi, 2018 jyly amerıkalyq Fabıano Karýanany jáne 2021 jyly reseılik Iаn Nepomnıashııdi jeńip, chempıondyq ataǵyn taǵy da úsh márte sátti qorǵady.