Alty jyldan keıingi altyn

Bıylǵy qysqy Ýnıversıada «á» degennen Qazaqstan sportshylary úshin sátti bastaldy. Jarystyń úshinshi kúninde bıat­lon saıysynda synǵa túsken jerlesemiz Vadım Kýrales 15 shaqyrymǵa jekeleı jarysta máre syzyǵyn birinshi keship, qysqy Ýnıversıadanyń bas júldesin jeńip aldy. Ol tórt oq atý aımaǵynda bir márte qatelikke boı aldyryp, atalǵan qashyqtyqty 44 mınýt, 37 sekýndta baǵyndyrdy. Ekinshi orynǵa oq atý kezeńinde tórt márte qatelesken norvegııalyq Orıan Moseng ıe boldy. Ol jer­lesimizden 42,6 sekýndqa qalyp qoıdy. Al úzdik úshtik­ti fransııalyq Aleks Garn túıindedi. Onyń ýaqyt kór­set­­kishi – 43 mınýt, 53 sekýnd. Son­­daı-aq taǵy bir Qazaqstan sport­shysy Aleksandr Mýhın márege altynshy bolyp jetti. Aleksandr oq atý kezeńinde bes márte qatelesti.

Osylaısha, Qazaqstan qu­ra­masy araǵa alty jyl salyp qysqy Ýnıversıadanyń alǵashqy altynyn jeńip aldy. Jerlesterimiz eń keıingi ret 2017 jyly Alataý baýraıynda uıymdastyrylǵan stýdentter dodasynda jeńis tuǵyrynan kóringen bolatyn. Al 2019 jyly Reseıdiń Krasnoıarsk qa­la­synda ótken Ýnıversıadada 4 kúmis, 4 qola medaldi qanaǵat tutqan-dy.

AQSh-taǵy Ýnıversıadanyń tórtinshi jarys kúninen keıin jalpykomandalyq esepte Ja­ponııa sportshylary 3 altyn, 1 kúmis, 1 qola medalmen kósh bastap keledi. 2 altyn, 1 kúmis, 3 qolasy bar Fransııa ekinshi orynǵa jaıǵassa, úshinshi satyda Chehııa sportshylary ornalasqan. Olardyń enshisinde – 1 altyn, 1 kúmis, 1 qola medal bar. Al bir-bir altyndy qorjynǵa salǵan Qazaqstan men Kanada 6-oryndy ózara bólisip tur.

Jalpy bıylǵy Ýnıver­sıadada Qazaqstan namysyn 78 sportshy qorǵap jatyr. Onyń ishinde shańǵymen jarysýdan – 14, short-trekten – 12, bıatlon­nan – 9, mánerlep syrǵanaý men konkımen júgirýden – 6, snoý­bord, taý shańǵysy spor­ty, tuǵyrdan sekirý men qos­saıystan – 2, shaıbaly hokkeıden 23 qazaqstandyq stýdent bar.

Qazirge deıin qazaqstandyq sportshylar qysqy ýnıversıadalarda 85 júldege (28 altyn, 25 kúmis pen 32 qola) qol jetkizgen. Iаǵnı jalpy medal esebinde 15-orynda tur.