Búgin Aýstralııanyń Melbýrn qalasynda tennısten «Úlken dýlyǵa» sanatyndaǵy eń iri tórt týrnırdiń biri – Aýstralııanyń ashyq birinshiliginiń jalaýy jelbireıdi. Júlde qory 51,5 mıllıon AQSh dollaryn quraıtyn jarystyń jekeleı básekesinde úsh otandasymyz óner kórsetedi. Kúni keshe jarystyń jerebesi tartylyp, Qazaqstan tennısshileriniń alǵashqy aınalymdaǵy qarsylastary belgili boldy.
Melbýrndegi jarysty birinshi bolyp jerlesterimizden Qazaqstannyń birinshi, álemniń 23-raketkasy Elena Rybakına bastaıdy. Ol búgin alǵashqy aınalymda dúnıejúzilik reıtıngte 67-orynda turǵan ıtalııalyq Elızabetta Kochcharetomen sheberlik baıqasady. Eki tennısshi búginge deıin kortta bir márte kezdesken. 2017 jyly AQSh ashyq birinshiliginiń 1/8 fınalynda Rybakına ıtalııalyq tennısshini eki sette – 6:4, 6:0 esebimen esh qıyndyqsyz jeńgen bolatyn. Eger, Rybakına ekinshi aınalymǵa ótip jatsa, álemdik reıtıngte 106-orynda turǵan 22 jastaǵy slovenııalyq Kaııa Iývan nemese 20 jastaǵy fransııalyq Selena Iаnıchıevıchpen (185) oınaıdy.
Al erteń erler arasynda Qazaqstannyń birinshi, álemniń 36-raketkasy Aleksandr Býblık reıtıngte ózinen tórt saty joǵary turǵan ıspanııalyq Alehandro Davıdovıch-Fokınamen kezdesedi. Bul tennısshiler de ázirge ózara tek bir márte sheberlik baıqasqan. 2021 jyly Barselona korttarynda ótken básekeniń alǵashqy kezeńinde Býblık qarsylasyn úsh sette – 2:1 (2:6, 7:5, 6:2) esebimen tize búktirgen. Aleksandrdyń ekinshi kezeńdegi yqtımal qarsylastary – 32 jastaǵy germanııalyq Iаn-Lennard Shtrýff (167) pen 35 jastaǵy amerıkalyq Tommı Pol (35).
Sondaı-aq erteń álemdik reıtıngte 51-satyda turǵan Iýlııa Pýtınseva álemniń 43-raketkasy rýmynııalyq Sorana Kyrstıamen saıysqa túsedi. Pýtınseva men Kyrstıa bir-birine óte jaqsy tanys tennısshiler. О́ıtkeni olar qazirge deıin kortta bes márte kezdesken. Úsh básekede jerlesimizdiń mereıi ústem bolǵan bolsa, ekeýinde rýmynııalyq tennısshiniń baǵy janǵan. Sońǵy ret eki tennısshi 2019 jyly Germanııadaǵy týrnırde bir-birine qarsylas atanǵan. Sol joly Iýlııa eki sette – 6:4, 7:5 esebimen basym túsken. Eger Pýtınseva ekinshi aınalymǵa shyǵyp jatsa, qytaılyq Sıý Van (49) nemese chehııalyq Karolına Plıshkovamen baq synaıdy.
Al juptyq básekede óner kórsetetin Andreı Golýbev – Aleksandr Nedovesov, Aleksandr Býblık – Djon-Patrık Smıt (Aýstralııa), Anna Danılına – Sanıa Mırza (Úndistan), Elena Rybakına – Anastasııa Pavlıýchenkova (Reseı) jáne Iýlııa Pýtınseva – Sofıa Kenınderdiń (AQSh) qarsylastary keıinirek belgili bolady.