AQSh-tyń Leı̆k-Plesıd qalasynda ótip jatqan qysqy Ýnıversıadada shaıbaly hokkeıden Qazaqstan quramasy qatarynan úsh oıynda qarsylastaryn iri eseppen tize búktirdi.
Ǵalym Mámbetálıev jetekshilik etetin jerlesterimiz úshinshi týrda Ulybrıtanııa quramasyna esh múmkindik qaldyrmaı, 15-1 esebimen tas talqanyn shyǵardy. Birinshi kezeńde Qazaqstannyń stýdent hokkeıshileri qarsylastarynyń qaqpasyna alty shaıba engizse, keıingi eki kezeńde taǵy toǵyz márte mergendik tanytty.
V tobynda synǵa túsip jatqan Qazaqstannyń stýdentter quramasy birinshi týrda Koreıa hokkeıshilerin 5:1 esebimen tize búktirse, ekinshi týrda Majarstan quramasyn 9:1 nátıjesimen súrindirgen-di. Jerlesterimiz kelesi oıynyn 17 qańtarda Slovakııa, 18 qańtarda AQSh quramasymen ótkizedi. A tobynda Kanada, Chehııa, Japonııa, Latvııa, Shvesııa jáne Ýkraına hokkeıshileri baq synap jatyr. Pleı-off kezeńine ár toptan birinshi jáne ekinshi oryn alǵan komandalar shyǵady.
Qazaqstan quramasy medal kestesindegi jalpykomandalyq esepte 1 altyn medalmen Estonııa ekeýi 9-oryndy bólisip tur. Jalǵyz júldeni el qorjynyna bıatlonshy Vadım Kýrales salǵan edi.