Qurlyqtyq hokkeı lıgasynda (QHL) baq synaıtyn elordanyń «Barysy» bıylǵy maýsymdy óte sátsiz ótkizip jatyr. Qazirgi tańda Andreı Skabelka shákirtteri «Shyǵys» konferensııasynyń jarys kestesinde 48 upaımen 11 komandanyń ishinde nebári 10-orynda keledi. Kósh sońynda turǵan «Amýrdyń» da enshisinde 48 upaı bar. Eger, jerlesterimiz endi qalǵan 16 týrda da eńse tiktemese, týrnır kestesinde joǵary orynnan kórinýi bylaı tursyn, Gagarın kýbogi jolyndaǵy jarysqa joldama beretin úzdik 8 klýbtyń qataryna iline almaı qalýy ábden múmkin.
Jańa maýsymnyń aldynda «Barysty» buǵan deıin eki jyl jattyqtyrǵan, sol aralyqta klýbpen birge tolaıym tabystarǵa qol jetkizgen Belarýs mamany Andreı Skabelka komanda tizginin ustaǵanda, jankúıerlerdiń qýanyshynda shek bolǵan joq. Barlyǵy da Qazaqstan komandasynyń bıylǵy turaqty birinshilikte táýir óner kórsetetinine senimdi bolǵan edi. Sebebi Andreı Vladımırovıch «Barys» tizginin ustaǵan alǵashqy maýsymynda-aq (2018/19) elorda ujymynyń QHL-da buryn-sońdy kórsetpegen nátıjesin tirkedi. Iаǵnı Qurlyqtyq hokkeı lıgasynyń tarıhynda bir maýsymda jınaǵan upaı sany boıynsha rekord ornatty. 62 oıynda 86 upaı jınady. Sonymen qatar Skabelkanyń basshylyǵymen ótken eki maýsymda «Barys» oıynshylary Chernyshev dıvızıonynda qatarynan eki jyl top bastap, eki márte Gagarın kýbogi jolyndaǵy jarystyń jartylaı fınalyna deıin jetti.
Osyndaı tabysty nátıjelerden keıin «Barys» jankúıerleri Belarýs mamanynyń Qazaqstanǵa ekinshi ret oralýy da jemisti bolady dep sengen edi. О́kinishke qaraı, «Barys» hokkeıshileri bıylǵy maýsymda jankúıerleriniń senimin aqtaı almaı otyr.
Jalpy, «Barystyń» bıylǵy maýsymdaǵy sátsizdigine mamandar ártúrli boljam aıtyp jatyr. Kóbisi Qazaqstan komandasynyń basshylyǵy maýsymaralyq úzilis kezinde transfer saıasatyn durys júrgizbedi dep esepteıdi. Árıne, bul pikirdiń de jany bar. Jaz mezgilinde komandadan tájirıbeli hokkeıshilerdiń bir shoǵyry ketti. Máselen, keıingi bes jylyn «Barysta» ótkizgen qorǵaýshy Valerıı Orehov Magnıtogorskiniń «Metallýrgine» aýyssa, elordalyq klýbta tabany kúrekteı 14 maýsym oınaǵan Roman Starchenko óz kúshin basqa klýbta synap kórýge bel býdy.
Orehov QHL-da 211 match ótkizip, 32 (8+24) upaı jınady. Al Qazaqstan quramasynyń kapıtany Starchenko 740 matchta 200 shaıba soǵyp, 377 márte áriptesterine nátıjeli pas bergen. Sondaı-aq Roman Starchenko – «Barys» tarıhyndaǵy eń úzdik eki surmergeniniń biri. Mine, «Barys» basshylyǵy komandanyń kóshbasshysyna, naǵyz bet-beınesine aınalǵan osyndaı hokkeıshilerdi op-ońaı ózge klýbtarǵa jibere salǵan.
Al olardyń ornyna 33 jastaǵy shaý tartqan kanadalyq qorǵaýshy Aleks Grant, 28 jastaǵy Djessı Grem men 26 jastaǵy Nelson Noje, QHL komandalarynda jarytyp oınamaǵan reseılik hokkeıshiler – Iýrıı Sergıenko, Mıhaıl Grıgorev, Ivan Mıshenko sekildi oıynshylardy aldyrtty. Sondaı-aq shabýylshylardan AQSh-tyń tek tómengi lıgalarynda oınaǵan Djeremı Brakko men Entonı Lýısti attaı qalap aldyrtty.
Atalǵan hokkeıshilerdiń osy maýsymdaǵy statıstıkasyna kóz júgirtsek, kimniń qaı deńgeıde oınap jatqanyn ońaı ańǵaramyz. Máselen, Aleks Grant bıyl nebári 18 matchta muzaıdynǵa shyǵyp, bes márte mergendik tanytsa, Djessı Grem barlyǵy 50 oıynǵa qatysyp, birde-bir shaıba soqpaǵan. Nelson Noje 36 kezdesýde bir-aq ret dáldik tanytqan eken. Iýrıı Sergıenko, Mıhaıl Grıgorev pen Ivan Mıshenkolar da bir retten kózge túskennen basqa eshteńe bitirmegen. Shabýylshylar Djeremı Brakko men Entonı Lýıs 46 jáne 47 matchta 10 shaıbany áreń qaqpaǵa engizgen.