Bul kúnderi Marokkonyń bas shahary – Rabatta stend atýdan Álem kýboginiń kezekti kezeńi ótip jatyr. Keshe Qazaqstannyń áıelder quramasy skıt baǵdarlamasynda altyn medal jeńip aldy.
Sportty damytý dıreksııasynyń baspasóz qyzmeti usynǵan málimet boıynsha Afrıka qurlyǵynda uıymdastyrylǵan dodada el namysyn Ásem Orynbaı, Adel Sadaqbaeva men Zoıa Kravchenko qorǵandy. Irikteý kezeńinde úzdik shyqqan jerlesterimiz fınaldyq básekede AQSh sportshylaryn 11-9 esebimen tize búktirip, altynnan alqa taqty.
Sál erterekte jekeleı synda óner kórsetken Zoıa Kravchenko 6-shy, Ásem Orynbaı 10-satyǵa turaqtaǵan. Qazaqstan quramasy jalpykomandalyq esepte 1 altynmen 3-orynda tur. Álem kýbogi 24 qańtarda máresine jetedi.