Bangkok qalasynda ótip jatqan 22 jasqa deıingi Azııa chempıonaty-2023 týrnıriniń fınalyna Qazaqstannyń úsh boksshysy shyqty, dep habarlaıdy Egemen.kz.
Fınalǵa Sanjar Tashkenbaı (48 kelige deıin), Nursultan Altynbek (54 kelige deıin) pen Mahmýd Sabyrhan (57 kelige deıin) ótti.
Mahmud Sabyrhan 57 kelige deıingi salmaq dárejesinde fınalǵa joldama alý úshin fılıppındik Ierıho Akaılarmen kezdesti. Jekpe-jek qorytyndysy boıynsha Mahmud Sabyrhan myqty bolyp shyqty. Ol tóreshilerdiń biraýyzdan qabyldaǵan sheshimimen jeńiske jetti. Endi ol altyn medal úshin Taıland eliniń sportshysy Saravýt Sýktetpen jekpe-jek ótkizedi.
54 keli salmaq dárejesinde Nursultan Altynbek pen Qyrǵyz eliniń boksshysy Islam Torobaev arasyndaǵy jartylaı fınaldyq jekpe-jektiń nátıjesinde otandasymyz jeńimpaz atandy. Endi ol altyn júlde úshin fınalda fılıppındik Flınt Djaramen kúsh synasady.
Sondaı-aq fınalǵa joldamany 48 keli salmaqta óner kórsetetin Qazaqstan quramasynyń ókili Sanjar Táshkenbaı aldy. Ol taılyq Nattafong Týamcharoendi oısyrata jeńdi. Aıta keteıik, Sanjar Táshkenbaı - bokstan jastar arasyndaǵy álem chempıonatynyń jáne eresekter arasyndaǵy Azııa chempıonatynyń jeńimpazy.
2023 jylǵy 22 jasqa deıingi Azııa chempıonaty 27 qańtarda aıaqtalady.