ASTANA. 15 maýsym. Chempıonattyń Fortaleza qalasynda D tobyndaǵy Ýrýgvaı men Kosta-Rıka quramalary arasynda ótken oıynynda ekinshi sensasııa tirkeldi. Onda kostarıkalyqtar 3:1 esebimen jeńiske jetti. Bul týraly egemen.kz habarlady.
Mamandar osy fınaldyq kezeńniń jerebesi tartylǵan boıda osy D tobyn ólispeı berispeıtinderdiń shoǵyrlanǵan jeri retinde atap edi. Munda olar toptaǵy Anglııa, Italııa jáne Ýrýgvaı komandalaryn esepke alǵan bolatyn. Al Kosta-Rıka jasaǵy tipti de nazarda bolǵan joq. Solaı bola tura, naǵyz topalańdy keshe osy qurama kórsetti.
Oıynnyń bas jaǵy mundaı nátıje ákeletinge uqsamady. Alańda barynsha baıaý da tepe-teń kúres júrip jatty. Ýrýgvaılyqtar aıryqsha basymdylyq ta tanyta qoıǵan joq. Al Kosta-Rıka meılinshe qatqyl oınady. Onyń qorǵaýshylary qarsy jaqtyń shabýylshylaryn óz shepterine qaraı kóp asa asyrmady. Sondyqtan ýýrgvaılyqtar sheberlikteri deńgeıimen alýǵa umtyldy. Osy sheberlik aqyrynda birinshi golǵa da apardy. Ýrýgvaı shabýylshylary kezekti buryshtama soǵý quqyǵyna qol jetkizdi. Al dop aıyp alańyna jetkizilgende, qarsylastar qorǵaýshylary tártip buzdy. Mine, osyǵan oraı belgilengen penaltıdi Edıson Kavanı 24-mınýtta dál túsirdi. Osymen birinshi taımnyń nátıjesi de ózgermedi.
Kosta-Rıka jigitteriniń úıirip soqqan daýyldary ekinshi taımda turdy. Onyń basyn shabýylshy Joel Kempbell bastap berdi. Keıin kezdesý sońynda úzdik oıynshy ataǵyna ıe bolatyn osy forvard budan keıin de jasyndaı jarqyldady. Sońǵy gol da onyń tikeleı aralasýymen soǵyldy. Degenmen, osy arada taǵy bir gol salynǵan edi. Aldymen 54-mınýtta esep teńestirilse, arada 3 mınýt ótkende, Oskar Dýarte kútpegen jerden Kosta-Rıkany alǵa shyǵardy. Ol aıyp alańynda qulap bara jatyp, dopty qaqpaǵa qaraı baǵyttap úlgerdi. Al úshinshi goldy Markos Ýrenıa 84-mınýtta Kempbelldiń jeke-dara alǵa shyǵarýy arqyly túsirdi. Budan keıin Ýrýgvaı fýtbolshylary qarsylasýlaryn qoıdy. Yzadan jarylardaı bolǵan olar tártip buzýshylyqty da jıiletti. Sonyń biri Maksı Pereıranyń Joeldiń aıaǵyn qyrqa tebýine aparyp soqtyrdy. Osy qasaqana jasaǵan áreketi úshin ýrýgvaılyq fýtbolshy alańnan qýyldy.
Damır Qojamqul.
Derekkóz: Chempıonat.Rý.
Foto: Chempıonat.Rý.