Indonezııa astanasy Djakartada vıntovka jáne tapanshamen nysana kózdeýden Álem kýbogi ótip jatyr. Keshe Qazaqstan quramasynyń qorjynyna ekinshi júlde tústi, dep habarlaıdy Egemen.kz Rrosports.kz-ke silteme jasap.
Qazaqstandyq Valerıı Rahymjan men Irına Iýnýsmetova pnevmatıkalyq tapanshamen 10 metrden nysana kózdeýde qola medal jeńip aldy. Qazaqstan quramasy aralas juptar arasyndaǵy júldege talasta Ońtústik Koreıa sportshylaryn 16-10 esebimen jeńdi. Ekinshi qola Aýstrııa mergenderine buıyrdy.
Aıta keteıik, 29 qańtarda Valerıı Rahymjan pnevmatıkalyq tapanshamen 10 metrden nysana kózdeýden jekeleı synda 4-oryn alǵan. Djakartadaǵy básekege barlyǵy 15 qazaqstandyq sportshy attandy. Olardyń bári Álem kýbogi qarsańynda 10-26 qańtar aralyǵynda Kýveıtte ótken oqý-jattyǵý jıynyna qatysqan.
Qazir Qazaqstan jáne Polsha quramasy jalpy esepte 2 medalmen (1 kúmis, 1 qola) 7-orynda tur.
Indonezııadaǵy saıysta (31 elden, 300-ge jýyq sportshy kelgen) reıtıng upaılary sarapqa salynyp jatyr. Al bul upaılar keıin Parıj Olımpıadasyna qatysýǵa múmkindik beredi. Álem kýbogi 7 aqpanda máresine jetedi.