Qazaqstannyń jas ári bolashaǵynan kóp úmit kúttiretin tennısshisi Zańǵar Nurlanuly alǵash ret jastar arasyndaǵy ITF Juniors týrnırinde top jardy.
Buǵan deıin jasóspirimder arasyndaǵy dodalarda san márte daralanyp, myqtylyǵymen tennıs mamandarynyń kózine túsken Zańǵar ótken jyldyń jeltoqsanynan beri joǵary sanatqa aýysyp, búginde ITF Juniors týrnırlerinde óner kórsetip júr.
Jýyrda otandasymyz Slovakııanyń Trnava qalasynda jalaýy jelbiregen 18 jasqa deıingi tennısshiler arasyndaǵy dodada barlyq qarsylasyn tize búktirip, jańa jas sanatyndaǵy óziniń alǵashqy iri jeńisine qol jetkizdi. Ol fınalda jergilikti tennısshi Danıel Balashekpen sheberlik baıqasyp, úsh setke jalǵasqan matchta 6:4, 3:6, 6:2 esebimen basym tústi.
Zańǵar byltyrǵy tennıs maýsymyn Tennis Europe reıtınginde úzdik ondyqtyń ishinde aıaqtap, uzaq ýaqyt chempıondyq kestede kósh bastaǵan-dy.