Indýstrııa jáne ınfraqurylymdyq damý mınıstrliginde vedomstvo basshysy Marat Qarabaev pen Sybaılas jemqorlyqqa qarsy is-qımyl agenttigi tóraǵasynyń birinshi orynbasary Dmıtrıı Malahovtyń qatysýymen otyrys ótti, dep habarlaıdy Egemen.kz.
Onda mınıstrliktiń quzyryndaǵy salalarda jemqorlyq faktilerin boldyrmaýdyń joldary pysyqtaldy.
Keńes barysynda sybaılas jemqorlyq táýekelderin joıýǵa baılanysty is-sharalar josparyn iske asyrý máseleleri qarastyrylyp, sondaı-aq qurylys salasy boıynsha bul baǵyttaǵy qarsy is-qımyldyń keshendi josparynyń tarmaqtaryn oryndaý máseleleri qaýzaldy.
Bul rette joǵaryda atalǵan is-sharalar josparyndaǵy tarmaqtardyń oryndalýy týraly Avtomobıl joldary komıtetiniń tóraǵasy T.Abdýllın, Kólik komıteti tóraǵasynyń orynbasary D.Qospabaev, sondaı-aq Qurylys jáne turǵyn úı-kommýnaldyq sharýashylyq isteri komıtetiniń tóraǵasy T.Qaraǵoıshın aıtyp berdi.
Kezdesýdiń qorytyndysy boıynsha IIDM men Sybaılas jemqorlyqqa qarsy is-qımyl agenttigi mınıstrlikke qaraıtyn salalarda jemqorlyq áreketterin aldyn alý men zań ústemdigin qamtamasyz etý úshin ózara is-qımyldy ornatý jóninde sheshim qabyldady. Bul óz kezeginde osy baǵyttaǵy jumysty ýaqtyly ári sapaly oryndaýǵa septigin tıgizbek. Buǵan qosa qatysýshylar sybaılas jemqorlyq táýekelderin joıýǵa baǵyttalǵan mindetterdi iske asyrýda tyǵyz yntymaqtastyqty nyǵaıtýǵa nıetti ekenderin jetkizdi.