Qandaı saılaý bolsyn onyń ádiletti ótýi mańyzdy. Qoǵamda saılaýdy táýelsiz baqylaýdyń jańa formatyn engizý týraly jıi aıtylyp júr. Bul rette elimizde «Daýys» qoǵamdyq baıqaýshylar koalısııasy quryldy.
Arnaıy uıymdastyrylǵan brıfıngte túrli qoǵamdyq uıymdardyń ókilderi «Daýys» qoǵamdyq baıqaýshylar koalısııasyna birigý týraly málimdedi. Koalısııa saılaý rásimderin qoǵamdyq baqylaý salasyndaǵy jumystyń ashyqtyq jáne demokratııalyq qaǵıdalaryna negizdelgen jańa formasııadaǵy ınstıtýtty bildiredi. Koalısııa quramyna ár óńirden baıqaýshylar, zańdy konsaltıng, medıa menedjment jáne kásibı koıchıng jumystaryn júzege asyrý salasynda úlken tájirıbege ıe 160-tan astam uıym kirdi. Koalısııa jumysyn uıymdastyrý jeke emes, ujymdyq jáne teń quqyly basqarý qaǵıdasy boıynsha júzege asyrylatyny úlken mańyzǵa ıe.
Is-shara barysynda koalısııa Májilis jáne máslıhattar depýtattarynyń saılaýyna qoǵamdyq baıqaýshylar retinde qatysý týraly óz nıetterin málimdedi. Sondaı-aq brıfıngke qatysýshylar koalısııanyń bir rettik bastama emes, júıeli uıym ekenin, onyń aıasynda saılaý rásimderin ádistemelik jáne quqyqtyq qamtamasyz etý, taldamalyq jáne aqparattyq jumystardy uıymdastyrý, saılaý úderisteriniń salasynda bilim bazasyn qalyptastyrý boıynsha túrli jobalar júzege asyrylatynyn atap ótti.
Koalısııanyń negizgi qyzmeti qoǵamda saılaý mádenıetin qalyptastyrýǵa, belsendi, talapshyl azamattyq kúshterdi tartýǵa baǵyttalǵan.