«Belarýs» traktorynyń bólshekteri Shymkentte jasalady

 Eýrazııalyq ekonomıkalyq odaq óziniń tıimdiligin kórsete bastady. Ony jýyrda jumysyn qaıta bastaǵan Shymkent qalasyndaǵy «Kardanval» AQ-tyń mysalynan baıqaýǵa bolady. 50 jyldan astam ýaqyt Mınsk traktor zaýytyn kardan biligi jáne krestovınamen qamtamasyz etip kelgen kásiporyn sońǵy úsh jylda óndirisi toqtap, endi qaıtadan iske kiristi. Zaýyt jumysynyń júrmeı qalýynyń sebebi, Belarýs mem­leketi ımport almastyrý baǵdar­lamasyna sáıkes, ózinde bólshek shyǵaratyn kásiporyn salyp, «Kardanval» AQ-tyń ónimine suranysty toqtatty. Alaıda, OQO kásipkerler palatasynyń kómegimen zaýyt basshylyǵy jýyrda Indýstrııa jáne jańa tehnologııalar birinshi vıse-mınıstri A.Raýmen júzdesken. Ol Belarýs Respýblıkasynyń ónerkásip mınıstrimen tikeleı habarlasyp, kezdesý uıymdastyryp bergen. Sóıtip, Qazaqstan jáne Belarýs memleketteri arasyndaǵy úkimetaralyq komıssııanyń hattamasyna sáıkes, bul másele ótken aıda óz sheshimin tapty. «Kardanval» AQ prezıdenti Jolshybek Sıqymbaevtyń aıtýynsha, kásiporyn bıylsha «MTZ-82» traktoryna 30 myń kardan bilikterin jasap beretin bolyp kelisipti. Odan túsetin paıda 150 mıllıon teńgeni quramaq. Al «bıylsha» degen sebebimiz, ujym aldaǵy ýaqytta Mınsk trak­tor zaýytymen uzaq merzimdi kelisimshart jasasyp, ónim kólemin ulǵaıtýdy josparlap otyr. Sonymen birge, keleshekte «MTZ-82»-den bólek 35 túrli ataýmen shyǵarylyp jatqan ózge de «Belarýs» traktorlarynyń bólshegin jasamaqshy. Kezinde «Kardanval» AQ-tyń óndiristik qýaty jylyna 200 myń dana kardan biligi men krestovınany quraǵan eken. Ol sonyń arqasynda búkil Reseı naryǵyn da atalǵan bólshektermen qamtamasyz etken. Endigi rette, ekonomıkalyq odaqtyń aıasynda ári burynǵy naryqty ózine qaıta qaratý maqsatynda ónimderin Reseıdiń saýda úılerine jóneltýdi qarastyryp jatyr. Búginde kásiporynda qyryqqa jýyq adam isteıdi. Kópshiligi zeı­­net­­kerlik jasqa kelip qalǵan bu­rynǵy qyzmetkerler. Sebebi, ja­s­tar munda kóp turaqtamaıdy eken. Zaýyt basshysynyń aıtýynsha, bul búgingi tańda kásiporyn úshin naǵyz problemaǵa aınalyp otyr. Degenmen, óndiris kóleminiń artýyna qaraı, aldaǵy ýaqytta jańadan 120 jumys ornyn ashý kózdelýde. Ánýar JUMAShBAEV. Ońtústik Qazaqstan oblysy.