Baıqońyr aýdany PB krımınaldyq polısııa qyzmetkerleri meshitte jasalǵan qylmystyń betin ashty. Jedel-izdestirý is-sharalary barysynda qomaqty somany qoldy qylǵan 31 jastaǵy er adam ustaldy, dep habarlaıdy Egemen.kz.
«Tergeý barysynda kúdikti Rahımov kóshesiniń boıynda ornalasqan meshitke kelip, namaz kezinde zaldyń eń sońǵy qatarynda turǵan. Sol kezde ol terezeniń aldynda jatqan kúrteshelerdi baıqaǵan. Jınalǵandardyń baıqamaı turǵanyn paıdalanyp, kúrteshelerdiń birinen ámııan taýyp alyp, ishinen 600 AQSh dollary kólemindegi aqshany ıemdenip alǵan. Keıin ámııandy kúrteshege qaıta salyp, meshitten shyǵyp ketken», delingen polısııa departamenti taratqan habarlamada.
Atalǵan derekke qatysty QR qylmystyq kodeksiniń 188-baby (urlyq) boıynsha sotqa deıingi tergeý amaldary júrgizilip jatyr.
Ustalǵan azamat kinásin tolyq moıyndady, al polısııa qyzmetkerleri zattaı dáleldemelerdi tárkiledi. Onyń buryn Astana aýmaǵynda jasalǵan osyǵan uqsas qylmystarǵa qatysy bar-joǵy tekserilip jatyr.