О́tken jyly Qazaqstan Dúnıejúzilik qaıyrymdylyq ındeksinde bes saty joǵary kóterilip, 93-orynǵa turaqtady. Búginde elimizde áleýmettik bastamalardy júzege asyratyn 40-qa jýyq qaıyrymdylyq uıymy bar, dep habarlaıdy Egemen.kz.
Qazaqstandyq qaıyrymdylyq qorlaryn birneshe túrge bólýge bolady: qaıyrymdylyqty damytý, áleýmettik jobalar, densaýlyq saqtaýdy, mádenıetti jáne bilim berýdi qoldaý, balalarǵa kómek, az qamtylǵan otbasylarǵa kómek, zańgerlik jáne áleýmettik kómek, qarttarǵa kómek, janýarlarǵa kómek. Olar mesenattardyń, qamqorshylardyń qarajaty esebinen istep turady.
23 aqpanda Astanada «Bolashak Bright» qaıyrymdylyq platformasynyń tusaýkeseri ótti.
«Keshe, 22 aqpanda bizdiń qorymyzǵa 12 jyl boldy. Osy ýaqyt aralyǵynda biz elimizde qaıyrymdylyqty júıeli túrde damytyp kelemiz. Sońǵy jyldary biz basqa qorlardyń júıeli damýyna qalaı kómektessek, olarǵa qalaı qoldaý kórsetsek dep jıi oılanatynbyz. Biz qaıyrymdylyq mádenıetin damytý jolyndamyz. «Bolashak Bright»-tyń arqasynda janashyr azamattarmen birlesip tamasha jobalardy qoldaı alatynymyzǵa senimdimiz. Jobanyń artyqshylyǵy – árbir qaıyrymdylyq jasaýshy baǵaly syılyq utyp alý múmkindigine ıe bolady», dedi «Bolashaq» qory Qamqorshylyq keńesiniń tóraıymy Dınara Gaplan.
Tusaýkeserge jobanyń uıymdastyrýshylary, «Ninety One» tobynyń músheleri, seriktester, qaıyrymdylyq qorlarynyń basshylary, blogerler, jýrnalıster qatysty.