«Amanat» partııasynyń respýblıkalyq saılaýaldy shtabynyń músheleri óńirlerde saılaýshylarmen kezdesýdi jalǵastyryp keledi. Bul joly amanattyqtar Qaraǵandy oblysynda bolyp, turǵyndardy saılaýaldy baǵdarlamasymen tanystyrdy.
Temirtaýda ekologtar, qala belsendileri jáne ónerkásip kásiporyndarynyń ókilderimen kezdesý barysynda partııanyń «Halyqpen birge!» saılaýaldy baǵdarlamasynda kórsetilgen ekologııalyq ahýaldy jaqsartý sharalary talqylandy.
– Ekologııa – azamattardyń ómir súrý sapasyna áser etetin mańyzdy faktorlardyń biri. Sondyqtan bizdiń saılaýaldy baǵdarlamamyzdyń bútindeı bir bólimi qorshaǵan ortany qorǵaýǵa arnalyp otyr. Biz óndirýshi jáne energetıkalyq kompanııalardyń zańnama aıasynda jumys isteýin qadaǵalaımyz. Zań talaptaryn aınalyp ótkisi keletinderge múmkindik berilmeıdi, – dedi partııa tóraǵasy Erlan Qoshanov.
Sondaı-aq qujatta lastaný deńgeıi joǵary eldi mekenderdegi kásiporyndardan shyǵatyn qaldyqtardyń normatıvin 40 paıyzǵa deıin tómendetý kózdelgen. Sý balansyn saqtaý úshin 14 jańa sý qoımasyn salý jáne jumys istep turǵan 16 sý qoımasyn qaıta jańartý josparlanyp otyr.
Kostenko atyndaǵy shahtada partııalyqtar kómir óndirýshiler men metallýrgter kásipodaq uıymdarynyń ókilderimen kezdesti. «Biliktiligi sheteldiktermen birdeı qazaqstandyq mamandar olarmen teń jalaqy alatyn bolady. Partııalyqtar zııandy jáne qaýipti óndiristerde jumys isteıtin jumysshylardyń zeınetke erte shyǵý múmkindigine qol jetkizedi. Elimizdiń barlyq kásipornynda eńbek medısınasy qyzmeti iske qosylady», dedi partııa basshylyǵy.
Budan soń partııalyqtar Qaraǵandy qalasyndaǵy «Suryptaý» temirjol stansasynyń eńbek ujymymen kólik jáne logıstıka salasyndaǵy ózekti máselelerdi talqylady.
Saılaýaldy baǵdarlamada elimizdegi temirjoldarda paıdalanylatyn otandyq materıaldardyń úlesin ulǵaıtý kózdelip otyr. Eski vagondar Qazaqstanda óndirilgen jańa vagondarǵa aýystyrylady.