Tabıǵattyń tańǵajaıybyn tamashalap, kıeli mekender tarıhymen tanysýǵa asyǵatyn týrısterdiń deni Atyraýdaǵy ortaǵasyrlyq Saraıshyq qalashyǵyna bet burady. Buǵan qosa «Aqjaıyq» memlekettik tabıǵı rezervaty, Naryn qumy, Inder aýdanyndaǵy Mahambet kesenesi men tuzdy kól, Qıǵash ózeninde gúldeıtin lotos alqaby men Aqkegershin borly taý silemderi saıahatshylar nazaryna jıi iligedi. Tipti Jylyoı aýdanynda ornalasqan Qulshan ata jerasty meshiti men Beket atanyń kindik qany tamǵan Aqmeshit, «Altyn adam» tabylǵan Araltóbe qorymy, Imanqara úńgiri nazardan tys qalǵan emes.
Statıstıkalyq málimetke súıensek, burnaǵy jyldyń 9 aıynda munaıly óńirge saıahattaýdy jany qalaıtyn 30,5 myń týrıst taban tiregen eken. Al byltyrǵy osyndaı kezeńde kelýshiler sany 108 158 adamdy qurap otyr. Onyń ishinde kelý týrızmi sanatyna jatatyndar – 13,7 adam. Ishki týrızmmen 94,3 myń adamnyń kelgeni tirkelgen. Bul aldyńǵy jylmen salystyrǵanda 3 esege kóp.
– Sheteldik týrısterdiń basym bóligi TMD quramyna kirmeıtin elderdiń turǵyndary bolyp otyr. Bul – 5 407 adam. Al alystaǵy AQSh-tan – 1 359, Birikken koroldikten – 532, Nıderlandtan – 298, Qytaıdan 159 týrıst munaıly óńirge keletinderdiń qataryn tolyqtyrdy. Mahambet aýdanyndaǵy Saraıshyq mýzeı-qoryǵynyń tarıhymen tanysýǵa aldyńǵy jyly 12 myń, byltyr 18,5 myńnan asa adam keldi, deıdi oblystyq kásipkerlik jáne týrızm basqarmasynyń bólim basshysy Jannat Sabyrǵalıeva.
Onyń aıtýynsha, 2025 jylǵa deıin týrızmdi damytý úshin 10,8 mlrd teńgeniń 9 ınvestısııalyq jobasy iske asyrylady. Bul jobalarda 338 jańa jumys orny ashylady. Máselen, «Saraıshyq» vızıt ortalyǵyn salýǵa bıýdjetten qarjy bólingen. Al 8 joba jeke ınvestısııa esebinen salynatyny dep josparlanyp otyr. Qazir 4 joba iske qosylǵan. Bular – «Nurly tal» etno-parki, Qurmanǵazy aýdanyndaǵy eki týrıstik-demalys bazasy men Maqat aýdanyndaǵy kempıng. Qurmanǵazy aýdanyndaǵy lotos alqabynyń tanymaldylyǵyn arttyrý úshin vıdeorolık ázirleý, Inder kóliniń quqyqtyq mártebesin aıqyndaý maqsatynda saraptamalyq zertteý jumystaryn júrgizý kózdelgen. О́tken jyly 6 týrıstik nysanǵa QR kod ornatylǵan. Osylaısha, týrıster 5 tilde aqparat alyp, 3D týr jasaý múmkindigine ıe bolǵan.
Munaıly óńirdiń batys qıyryndaǵy Qurmanǵazy aýdanynda Qıǵash degen ózen bar. Bul ózen Reseı Federasııasynyń Astrahan óńirimen aradaǵy shekarany qaq jara aǵady. Jyl saıyn shildeniń ortasynan tamyzdyń sońyna deıin ózen saǵasynda lotos gúldeıdi. Ony tamashalaý úshin «Aqtóbe – Atyraý – Reseı Federasııasynyń shekarasy» baǵytyndaǵy jolmen ǵana jetýge bolady. Araqashyqtyq – 300 shaqyrymǵa jýyq.
Sý betinde gúldep turǵan lotostyń ádemiligin tek kózben kórý kerek. Hosh ıisi murnyńdy jarady. Lotostyń túsi – qyzǵylt, bıiktigi 150 santımetrge deıin jetedi. Bir qyzyǵy, sý ortasynda ósetin lotos tańerteń qaýyzyn ashyp, keshke qaıta jabady. Tańerteń sý betinde qaýyzyn ashqanda qurǵaq bolyp turady. Bul gúldi úndister men vetnamdyqtar tazalyqtyń sımvoly retinde baǵalaıdy. Tipti onyń emdik qasıeti bar dep esepteledi. Tuqymyndaǵy aqýyz búırek pen kókbaýyr, júrek aýrýy men uıqysyzdyqty emdeýge qoldanylady eken. Alaıda lotos gúlin julýǵa bolmaıdy. Sebebi bul elimizdegi sırek kezdesetin ósimdikterdiń tizimine engizilgen.
Máselen, byltyr eki el sharasyndaǵy sý aıdynynda gúldegen lotosty kórýge kúnine 50 týrıst kelgen. Sondaı týrıst Ekaterına Habıbýllına – Máskeý qalasynda arnaıy kelgen týrısterdiń biri. Sheteldik týrıst byltyr lotos alqabyn alǵash ret kórgen eken.
– Tabıǵat osyndaı sulýlyǵymen qymbat qoı. Lotos alqaby tamasha eken. О́te keremet áser aldym. Bul jerden tek lotosty ǵana emes, aqqý, aqqutan syndy qustardy da tamashaladyq, – degen edi E.Habıbýllına.
Atyraý oblysyndaǵy Qurmanǵazy aýdany – lotos ósetin jalǵyz aımaq. Lotos alqabyn kórýge kelýshilerge arnaıy nusqaýlyq kómek kórsetetin kásipkerlik nysandar bar.
«Biz birneshe týrıstik kompanııamen kelissóz júrgizdik. Kelisimshartqa sáıkes aýdanǵa kelgen týrısterdi jazda qaıyqpen lotos alqabyna aparyp-ákelemiz. Týrıster ornalasatyn arnaıy bazada tynyǵatyn oryn daıyndadyq. Bizdiń maqsatymyz – týrısterdiń qaýipsizdigin, sýda júrýdiń tehnıkalyq talabyn qatań saqtaý», deıdi «West Motors service» JShS-nyń ókili Jánibek Aqtananov.
Atyraý oblysy