Senatta «2023 – 2025 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna ózgerister men tolyqtyrý engizý týraly» zań jobasynyń tanystyrylymy ótti, dep habarlaıdy Egemen.kz.
Kezdesýdi ashqan qarjy jáne bıýdjet komıtetiniń tóraǵasy Sultanbek Mákejanov bul zań jobasy bıýdjet zańnamasyn jetildirýge jáne elimizdegi áleýmettik-ekonomıkalyq jaǵdaıdy jaqsartýǵa baǵyttalǵanyn atap ótti.
Zań jobasy bıylǵy aqpan aıynda 2023-2027 jyldarǵa arnalǵan bıýdjet kórsetkishterin naqtylaýǵa baılanysty ázirlengenin atap ótken jón. Ol sonymen qatar óńirlerdiń ınfraqurylymyn damytýǵa, gaz jáne jylýmen jabdyqtaý qubyrlaryn jańǵyrtýǵa, elimizdiń tranzıttik áleýetin damytýǵa, ekonomıkanyń naqty sektoryn jáne basqa da salalardy órkendetýge baǵyttalyp otyr.
Senatorlarǵa shaǵyn jáne orta bıznesti damytýǵa qosymsha 152 mlrd teńge, al elimizdiń qorǵanys qabileti men qaýipsizdigin qamtamasyz etýge 94,7 mlrd teńge bólinetini aıtyldy.
Zań jobasyn ázirleýshilerdiń pikirinshe, ol azamattardyń ál-aýqatyn arttyrýdy, múgedek adamdardyń ómir súrý sapasyn jaqsartýdy jáne azamattardyń áleýmettik kepildikterin qamtamasyz etýdi kózdeıdi. Máselen, halyqtyń áleýmettik osal toptary úshin kommýnaldyq turǵyn úı qoryn tolyqtyrýǵa, Áleýmettik kodeks aıasyndaǵy sharalardy iske asyrýǵa jáne basqa da salalarǵa baǵyttalatyn 234,4 mlrd teńge mólsherinde qosymsha qarjy bólý josparlanyp otyr.
Parlament depýtattary tanystyrylym barysynda bıýdjettik zańnamaǵa ózgerister men tolyqtyrýlardyń keıbir tarmaqtary boıynsha suraqtar qoıyp, usynystaryn ortaǵa saldy.