Mańǵystaý oblysynda ejelgi Qaraqabaq qalashyǵynyń aýmaǵynda ashyq aspan astyndaǵy arheologııalyq mýzeı ashý josparlanyp otyr. Ǵalymdar bul meken Uly Jibek jolynyń mańyzdy saýda toraptarynyń biri bolǵanyn aıtady, dep jazady Egemen.kz.
Túpqaraǵan aýdanyndaǵy Qaraqabaq kóne qalashyǵynda arheologııalyq qazba jumystary 2017 jyldan beri júrgizilip keledi. Osy ýaqyt aralyǵynda mamandar altyn áshekeıler, mórler, keramıkalyq buıymdar men 150-ge jýyq kóne tıyn tapqan. Tabylǵan jádigerler Mańǵystaý óńiriniń erte dáýirdegi halyqaralyq saýda baılanystarynda aıryqsha ról atqarǵanyn kórsetedi.
Arheolog Andreı Astafevtiń aıtýynsha, qazba kezinde Vızantııa dáýirine tıesili qorǵasyn saýda móri anyqtalǵan. Bul – Mańǵystaýdyń kóne zamanda halyqaralyq saýda júıesine keńinen aralasqanyn dáleldeıtin sırek olja. Mundaı aıǵaqtar óńirdiń tarıhı mańyzyn aıqyn kórsetedi.
Mańǵystaýda eki myńjyldyq tarıhy bar qala zerttelip jatyr
Ǵalymdardyń paıymdaýynsha, shamamen eki myń jyl buryn qazirgi Taýshyq aýylynan 17 shaqyrym jerde ornalasqan Qaraqabaqta qyzý tirshilik bolǵan. Sol kezeńde bul aýmaq Qytaı men Úndistandy Rım ımperııasymen baılanystyratyn teńiz jáne qurlyq joldarynyń mańyzdy beketine aınalǵan.
Otandyq telearnanyń málimetinshe, qazir oblystyq mýzeıdiń ǵylymı zerthanasynda Qaraqabaqtan tabylǵan kóne tostaǵandar, keramıka synyqtary men zergerlik buıymdar saqtaýly tur. Olardyń qatarynda aqsúıek áıelge tıesili bolýy múmkin altyn syrǵa men adam beınesi men jebe qashalǵan mór júzik bar. Mamandar bul artefaktilerdiń jasy shamamen 1,5 myń jyl ekenin aıtady.
Mańǵystaý oblystyq mádenıet, tilderdi damytý jáne arhıv isi basqarmasynyń basshysy Nurtas Sálıdiń sózinshe, ejelgi Kaspıı teńiziniń kartasynda ǵalym Klavdıı Ptolemeı kórsetken Aspabota qalasy qazirgi Qaraqabaq bolýy múmkin.
«Qalashyqtyń jalpy aýmaǵy 12 sharshy shaqyrymdy quraıdy. Jýyrda óńir basshylyǵy men Qazaqstan arheologııa ınstıtýtynyń mamandary zertteý nátıjelerimen tanysyp, aldaǵy birlesken jumystardy talqylady», dedi ol.
Joba aıasynda Qaraqabaq aýmaǵynda ashyq aspan astyndaǵy mýzeı, ǵylymı baza, týrıstik ınfraqurylym jáne ekskýrsııalyq baǵyttar ashý kózdelip otyr. Arheologter qazba jumystaryn mamyr aıynyń sońynda qaıta jalǵastyrmaq.
Mańǵystaýda 40 mln jyl burynǵy akýla tisteri tabyldy