Qazaqstanda fermerlerge bordaqylaý alańdaryn damytý úshin jyldyq 5%-ben jeńildetilgen nesıe berý bastaldy. Bul týraly Agrarlyq nesıe korporasııasy habarlady, dep jazady Egemen.kz.
Jańa baǵdarlama aıasynda sharýalar 12 aıǵa deıin nesıe rásimdeı alady. Qarjynyń keminde 70%-y iri jáne usaq maldy satyp alýǵa baǵyttalýy tıis. Qalǵan 30%-yn jem-shóp, janar-jaǵarmaı, tehnıka bólshekteri, sondaı-aq maldy sáıkestendirýge arnalǵan chıpter men syrǵalardy satyp alýǵa jumsaýǵa bolady.
Agrarlyq nesıe korporasııasynyń málimetinshe, baǵdarlama ishki naryqty sapaly etpen qamtamasyz etip, baǵany turaqtandyrýǵa baǵyttalǵan.
«Atalǵan baǵdarlama ishki naryqty sapaly etpen qamtamasyz etip, saýda oryndaryndaǵy baǵany turaqtandyrýǵa múmkindik beredi. Biz fermerler qymbat naryqtyq qarjylandyrý kózderin izdeýge alańdamaı, mal men jem-shópti jedel satyp ala alýy úshin qarjyǵa qoljetimdilikti jeńildettik», dep atap ótti Agrarlyq nesıe korporasııasynda.
Nesıe tólemin keshiktirgende neni bilgen jón?
Qarjylandyrý tikeleı korporasııa fılıaldary arqyly nemese nesıe seriktestikteri, ekinshi deńgeıli bankter men mıkroqarjy uıymdary arqyly júzege asady.
Baǵdarlamaǵa qatysý úshin bordaqylaý alańy keminde 500 bas iri qaraǵa nemese 1 000 bas usaq malǵa eseptelýi qajet. Sonymen qatar sharýashylyqtarda qajetti ınfraqurylym, sý júıesi, karantın alańy jáne ekologııalyq qorytyndy bolýy tıis.
Aıta keteıik, buǵan deıin Aýyl sharýashylyǵy mınıstrligi sharýalarǵa sıyr etiniń baǵasyn 3275 teńgeden asyrmaý týraly mindetteme engizgen bolatyn.