Túrkııa basshysy Rejep Taııp Erdoǵan Memleket basshysy Qasym-Jomart Toqaevqa Qazaqstan Táýelsizdiginiń 35 jyldyǵyna jáne Túrkııa-Qazaqstan yntymaqtastyǵynyń 34 jyldyǵyna oraı arnaıy ázirlengen kitapty syıǵa tartty, dep habarlaıdy Egemen.kz.
Anadoly agenttiginiń jazýynsha, «Táýelsizdiktiń 35 jyldyǵynda Túrkııa-Qazaqstan qatynastary» atty kitap Túrkııanyń Ádilet jáne damý partııasy (AK Parti) tóraǵasynyń orynbasary, Túrki memleketterimen baılanys basqarmasynyń tóraǵasy Kúrshad Zorlýdyń redaktorlyǵymen daıyndalǵan jáne oǵan 10 akademık pen avtordyń ǵylymı-taldamalyq materıaldary toptastyrylǵan.
Kitaptyń alǵy sózin Túrkııa Respýblıkasynyń Prezıdenti Rejep Taııp Erdoǵan ózi jazyp, memlekettik sapary barysynda Astanada áriptesi – Qazaqstannyń Memleket basshysy Qasym-Jomart Toqaevqa tartý etti.
Jınaq-kitaptyń kirispesine Prezıdent Erdoǵan: «Túrkııa men Qazaqstan arasyndaǵy qatynastar aldaǵy kezeńde odan ári nyǵaıyp, tereńdeı túsetinine senimimiz mol. Osyndaı eńbekter ózara túsinistikti kúsheıtip, yntymaqtastyq múmkindikterin keńeıtip, ortaq tarıh pen bolashaqqa degen kózqarasty nyǵaıtatyn mańyzdy mindet atqaratyny sózsiz. Eki el arasyndaǵy baılanystar Túrki memleketteri uıymy aıasyndaǵy kópjaqty yntymaqtastyq tetikteri arqyly ekijaqty ólshemnen asyp tústi. Qadirli baýyrym Qazaqstan Prezıdenti Qasym-Jomart Toqaevtyń parasatty ári kóregen kóshbasshylyǵynyń arqasynda bul qatynastar ózara kúsh-jigerimizdiń nátıjesinde jańa serpinge ıe boldy. Eńbekti daıyndaýǵa úles qosqan AK Parti Túrki memleketterimen baılanys basqarmasyna jáne óz salasynyń maıtalmandary sanalatyn – qadirli ǵalymdarymyzǵa alǵys bildiremin. Bul eńbektiń Túrkııa men Qazaqstan arasyndaǵy dostyq pen baýyrlastyqty odan ári nyǵaıtýǵa septigin tıgizýine tilektespin», dep jazdy.
Kúrshad Zorlý jýrnalısterge bergen suhbatynda AK Parti Túrki memleketterimen baılanys basqarmasy mańyzdy eńbekke bastamashy bolǵanyn atap ótti.
«Biz bul eńbekti Qazaqstan Táýelsizdiginiń 35 jyldyǵyna arnaıy daıyndadyq. Kitaptyń túrik jáne qazaq tilderinde jaryq kórýi ári elderimizge qajet eń tereń taqyryptardy qamtýy óte mańyzdy. Kitaptyń artqy muqabasyna eki prezıdenttiń «Orta dáliz» týraly sózderin arnaıy ornalastyrdyq. Munyń ózi Túrkııa-Qazaqstan qatynastarynyń Eýrazııa ekonomıkasy úshin mańyzyn aıqyn kórsetedi», dedi ol.
Eske sala keteıik, 13 mamyrda Túrkııa Prezıdenti Rejep Taııp Erdoǵan Qazaqstanǵa memlekettik saparmen keldi. Ony áýejaıda Qasym-Jomart Toqaev ózi qarsy aldy. Memleket basshysy Qasym-Jomart Toqaev áleýmettik jelidegi paraqshasynda Rejep Taııp Erdoǵanmen birge túsken fotosyn jarııalady.