Qazaqstanda jeke kýálikti nemese tólqujatty bir kúnde rásimdeýge bolatyn jańa termınal paıda boldy. Bul týraly Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın aıtyp berdi, dep habarlaıdy Egemen.kz.
«Kezek kútýge, sodan keıin kóshi-qon qyzmetiniń qyzmetkerinen tirkeýden ótip, sýretke túsip, tólem jasaý úshin kassaǵa bólek júgirýge ýaqyt jumsaýdyń qajeti joq. Qujattaý termınaly bárin bir jerde jasaýǵa múmkindik beredi, sonymen qatar árbir adam qujat úshin sátti túsken sýretin óz betinshe tańdaı alady. Prosess 10 mınýt ýaqyttan aspaıdy», dep jazdy mınıstr.
Alaıda qatelikter men túsinispeýshilikterdi boldyrmaý úshin ótinish berýshige kóshi-qon qyzmetiniń qyzmetkerine júginý qajet bolady. Ol ótinishtiń, sýrettiń jáne qoltańbanyń sáıkestigin tekseredi.
«Ázirge mundaı termınal tek Astana qalasynda Kereı men Jánibek handar kóshesiniń 4/1 úıinde ornalasqan HQKO-da ornatylǵan. Aldaǵy ýaqytta osy jobany barlyq óńirlerde iske asyrý josparlanyp otyr», dedi Baǵdat Mýsın.