27 jyldan beri ǵumyryn orman sharýashylyǵy qyzmetine arnaǵan Kúlpaný Qurmanǵalıevanyń qajyr-qaıratyna qaıran qaldyq. Sodan áıelder merekesi qarsańynda ormanshymen az-kem sóılesken edik.
Kúlpaný Qurmanǵalıeva - «Ertis ormany» MOTR RMM Shaldaı fılıaly, Shoshqaly ormanshylyǵynyń Aýmaqty qorǵaý jónindegi ınspektory - memlekettik ınspektor. Ol 1967 jyly 2 mamyrda týǵan. Bilimi arnaıy-orta. Kásibı eńbek jolyn 1986 jyly 15 aýladan aspaıtyn shaǵyn orman aýylynan bastaǵan. Áıelde Shaldaı fılıalynyń Shoshqaly ormanshylyǵynyń órt-hımııalyq stansııasynyń radıo operatory bolyp istegen. Keıin memlekettik ınpektor kómekshisi laýazymynda jumys istedi. 2017 jyly Shoshqaly ormanshylyǵynyń aýmaqty qorǵaý ınspektory – memlekettik ınspektory bolyp taǵaıyndaldy. Búginge deıin osy laýazymda eńbek etip keledi.
K.Qurmanǵalıeva ormanshylar áýletinen shyqqan. Orman sharýashylyǵyndaǵy jumys ótili - 27 jyl. Áriptesteri ony jumysqa jaýapty, saýatty qyzmetker retinde baǵalaıdy.
- Orman sharýashylyǵyna qalaı tap boldyńyz?
- Men 10 jyl jalpy bilim beretin shaǵyn mektepte jumys istegenmin. Keıin bilim ordasy jabylyp qaldy. Sol kezde memlekettik-ınspektor bolý týraly usynys tústi. Kelistim. Sóıtip, Pavlodar tehnologııalyq kolledjine orman jáne orman sharýashylyǵy mamandyǵy boıynsha oqýǵa tústim. Sol kezden beri Shoshqaly ormanshylyǵynda eńbek etip kelemin. Búginde sharýashylyqtyń Aýmaqty qorǵaý jónindegi ınspektory - memlekettik ınspektory qyzmetin atqaramyn.
- 27 jyl boıy osy salada eńbek etip kelesiz. Az ýaqyt emes. Búginge deıin basqa jumysqa aýysqyńyz kelgen kezder boldy ma?
- Joq. Qazirgi qyzmetimdi ózgertkim kelmeıdi. О́zimdi basqa salada elestete almaımyn.
- Sharýashylyqtyń qıyndyǵy jaıly aıtyp bere alasyz ba?
- Kóp qoı. Mysaly, orman daqyldaryn otyrǵyzý kezeńi, aramshópterdi joıý, ormandaǵy aǵashtardy zańsyz kesetinderden qorǵaý, orman alqabynda tutanǵan órtti óshirý, tazalaý jumystary, bıologııalyq keshendi is-sharalar (zııankestermen kúres), sondaı-aq janýarlar álemin qorǵaý ońaı jumys deı almas edim.
- Jumys kezinde qyzyqty oqıǵalar bolatyn shyǵar...
- Bilesiz be?! Men úshin ormandaǵy tirshilik ıesiniń qansha jáne qandaı ómir súretinin baqylaýdyń ózi qyzyq. Qyzyqty oqıǵalar sol orman daqyldaryn túgendeý kezinde bolady.
- Áıel men ormandy ne baılanystyrady?
- Orman da áıel sııaqty: jaınaıdy, aınalasyna jupar shashady, jemis beredi.
- Sizge qandaı jyl mezgili unaıdy?
- Maǵan qys mezgili unaıdy. Sebebi, qys aılarynda orman órti bolmaıdy. Bul sanańdy tazartyp, mıyńdy tynyqtyrýǵa qolaıly kezeń. Ári aq ulpaǵa oranǵan dala da kózdiń jaýyn alady. Taza aýasyn aıtsańshy.
Bos ýaqytyńyzda nemen shuǵyldanasyz?
- Qolym qalt etkende kitap oqımyn. Qysta ormanda serýendegendi unatamyn. Al jazda bos ýaqyt bola qoımaıdy...