Qazaq jankúıerleri ózbekstandyq Odılhon Kamolovty jaqsy biledi. «OCTAGON» lıgasynda óner kórsetip júrgen ol Almatyǵa kelip, jerlesterimizben úsh ret kúsh synasty. Sol jarystarda Kamolov Aıdar Áliphan men Erkebulan Toqtardy aıqyn basymdyqpen jeńip, Jaqsylyq Tursynbaıdan oısyraı jeńildi.
Dál osy Odılhonnyń basy qazir úlken daýǵa qaldy. Máseleniń mánisi mynadaı: 4 naýryzda Tashkenttegi «OCTAGON-42» týrnırinde ol «Kamıl Karate» degen janama esimmen tanylǵan Tájikstannyń tanymal sportshysy, kýmıteden álem chempıonatynyń kúmis júldegeri Kamarıddın Hasanovpen kúsh synasty. Torǵa kirmes buryn-aq qarsylastar jekpe-jek tóńiregindegi jaǵdaıdy shegine jetkizip, áleýmettik jeli arqyly bir-birin ońdyrmaı balaǵattady. Tipti ekeýi Tashkenttegi dámhanalardyń birinde tóbelesken de kórinedi. Osylaısha, kópshilik taǵatsyzdana kútken aıqas ótetin kún de kelip jetti. Biraq birinshi raýndta «Kamıl Karate» qolyn qatty jaraqattap alyp, báseke merziminen buryn toqtatyldy. Aqyry bul jekpe-jektiń nátıjesi esepke alynǵan joq.
Keıin málim bolǵandaı, atalǵan jarystyń ótýine bir kún qalǵanda Kamarıddın Hasanov ornalasqan qonaqúıge Odılhon Kamolov kelip, onyń birinshi raýndta utylýyn ótingen eken. Sol «qyzmeti» úshin 6 myń AQSh dollary kóleminde qarjy usynǵan. Jartysyn qazir alasyń, qalǵanyn jekpe-jek aıaqtalǵan soń beremin dep ýáde etipti. Ekijaqty «kelissózder» barysyn beınebaılanys arqyly ózbek sportshysynyń resmı ókili Dılshod Omırov baqylap otyrǵan. Ol: «Jarys О́zbekstanda ótetindikten, bizdiń jeńilýge qaqymyz joq. Odılhon qalaı da utýy kerek. Eger sen kelisim bermeseń, onda biz bul jekpe-jekti ótkizbeýdiń bir amalyn tabamyz», dep kesip aıtqan.
Joǵarydaǵy usynysqa keliskendeı syńaı tanytqan «Kamıl Karate» qarsylasy qonaqúıden ketken bette birden «OCTAGON» lıgasynyń bas menedjeri Pavel Bersenevke kelip, osy jaǵdaıdy basynan aıaǵyna deıin baıandap beredi. Jáne de aldyn ala kelisilgen kezdesýlerge qatysýǵa óziniń esh qulqy joq ekenin de aıtady. Sonymen qatar salmaǵy ózinen áldeqaıda aýyr qarsylasymen kúsh synasýǵa ázir ekenin de málim etken. Al bul básekeniń qalaı aıaqtalǵanyn biz joǵaryda baıandadyq.
Jarys aıaqtalǵannan keıin atalǵan lıganyń prezıdenti Nuraddın Sadyqov ǵalamtor arqyly barsha jankúıerge resmı túrde málimdeme jasap, jaǵdaıdyń mán-jaıyn táptishtep turyp túsindiredi. Al osyndaı aramza áreketke barǵan Odılhon Kamolovqa qandaı jaza qoldanylatyny aldaǵy ýaqytta belgili bolady.