Qazaqstan Respýblıkasy Parlamenti Senatynyń Tóraǵasy Máýlen Áshimbaev Amal merekesine oraı Facebook jáne Instagram áleýmettik jelilerinde jazba qaldyrdy, dep habarlaıdy Egemen.kz.
«Qurmetti dostar! Barshańyzdy Amal merekesimen shyn júrekten quttyqtaımyn!
Amal – jyldyń basy, qystyń qahary qaıtyp, halyq jaımashýaq kóktemmen qaýyshatyn erekshe sát.
Bir kezderi elimizdiń batys óńirlerinde ǵana toılanatyn bul meıram búginde keń baıtaq Qazaqstannyń ár qıyrynda atalyp ótedi. Buǵan sońǵy jyldarda áz-Naýryzdyń mazmunyn baıytý turǵysynan jasalǵan mańyzdy qadamdardyń da oń áseri bolǵany sózsiz.
Osy kúnderi alys-jaqyndaǵy aǵaıyn arqa-jarqa bolyp, qol alysyp, tós qaǵystyryp, bir-birine izet-qurmet kórsetip, meıirimdilik tanytady. Sondyqtan mundaı ıgi dástúrdiń ultymyzdyń yrysyn arttyrýǵa, halqymyzdyń birligin bekemdeýge qosar úlesi mol, urpaqqa berer taǵylymy zor dep esepteımiz.
Barshańyzdy jan jadyratar osynaý kóktem merekesimen quttyqtaı otyryp, ár shańyraqqa jaqsylyq, qýanysh jáne baq-bereke tileımin! Amaldan amalǵa aman-esen jete bereıik! Jyl qutty bolsyn, aǵaıyn!», delingen Senat Tóraǵasynyń quttyqtaýynda.