Úkimette Premer-mınıstr Álıhan Smaıylovtyń tóraǵalyǵymen ótken keńeste Qytaımen shekaradaǵy ótkizý beketteri arqyly júk avtokólik quraldarynyń ótýin jedeldetý jónindegi sharalar talqylandy, dep habarlaıdy Egemen.kz Úkimettiń baspasóz qyzmetine silteme jasap.
Búginde «Nur Joly» baqylaý-ótkizý beketinde kommersııalyq júkterdi ótkizetin tasymaldaýshylardan turatyn uzyn-sonar kezek qalyptasqany atap ótildi.
Atap aıtqanda, buǵan Qytaıdyń kovıdke baılanysty qoıǵan kólik shekteýlerin alyp tastaýy tikeleı áser etip, nátıjesinde aradaǵy júk tasymaly ulǵaıǵan edi. Bul kezek elektrondyq túrde QR QM «Aqparattyq-esepteý ortalyǵy» AQ platformasynda Qoldau.kz saıty arqyly júrgiziledi.
Sonymen qatar ákimshilik kedergilerdi qosa alǵanda, birqatar faktorǵa baılanysty ótkizý beketi tolyq kúshin paıdalanyp jatqan joq, táýligine 100-den aspaıtyn júk kóligine qyzmet kórsetiledi. О́z kezeginde bul jabdyqtar men quramdas bólshekterge muqtaj ınvestısııalyq jobalardy iske asyrýǵa keri áser etedi jáne jalpy el ekonomıkasynyń damýyn tejeıdi.
Premer-mınıstr úsh kún merzimde jasandy kedergilerdi joıý boıynsha normatıvtik ózgerister daıyndaýdy tapsyrdy, bul shekaradaǵy orynsyz kedergilerdi jedel joıýǵa jáne osylaısha táýligine myńǵa jýyq avtokólikti ótkizýge múmkindik beredi.
«Búgin-erteń osy kedergilerdiń barlyǵyn alyp tastaý kerek. Eger osy beket arqyly myń mashınany ótkizý qajet bolsa, ony qamtamasyz etý kerek. Bıznes bizden kómek surap jatyr. Adamdardyń júkteri bekette tur, olar sharasyz kúıde», dedi Álıhan Smaıylov.
Budan basqa ýákiletti organdarǵa osyndaı kezektiń jınaqtalyp qalýyna jaýaptylar týraly aqparat usyný jáne shekara beketteriniń ótkizý qabiletin odan ári arttyrý jónindegi sharalardy pysyqtaý tapsyryldy.