Áıelderdi erkektermen shatastyrýǵa bola ma?

Bolǵanda qandaı! Aınalaıyn atamyz qazaq «qalaýyn tapsa qar janady», dep bilip aıtqan ǵoı. Senbeseńiz, Petropavlǵa kelip, oblystyq prokýratýranyń máli­metterine qanyqsańyz tóbe shashy­­ńyz tik turmasa biz-aq ótirik­shi bo­laıyq. Álqıssa, sonymen den­saý­lyq saqtaý salasyna qatys­ty beti ashylǵan óreskel olqy­lyq­tardyń keıbirin «sóıletip kóreıik». Quzyrly organnyń jýyrda ótken kezekti májilisinde bir jarym jyldyń ishinde aýrýhanalarda 45 adamnyń qaıtys bolǵany, olardyń keıbiri medısına qyzmetkerleriniń biliksizdigi men bilimsizdiginen kóz jumǵany naqty mysaldarmen baıandaldy. О́zderiniń mindetterine saldyr-salaq qaraǵany úshin 18 meıirbıkege qatysty qylmystyq is qozǵalǵan. Mysaly, oblys ortalyǵyndaǵy № 3 aýrýhanada jas anaǵa tolǵaq kezinde jedel medısınalyq kómek kórsetilmeýi saldarynan sharana óli týǵan. Jalǵan anyqtama toltyrý, jeńildikpen beriletin dári-dármekterdi aqshaǵa aldyrtý, arnaıy mamandar joqtyǵynan jańa qondyrǵylardyń bosqa qańtarylyp turýy sekildi faktiler tirkelgen. Bir jaǵynan, mundaı kemshilikterdiń oryn alýyna joǵary bilimdi mamandardyń jetispeýshiligi keri áserin tıgizip otyrǵany alańdatpaı qoımaıdy. Tımırıazev aýdanynda jumys isteıtin bir dáriger ári hırýrg ári onkolog ári otolarıngolog qyzmetin qosa atqarady eken. Budan keıin qandaı sapaly em-dom kútýge bolady degen suraq óz-ózinen týyndaıdy. Eń soraqysy sol, soltús­tik­qazaqstandyq dárigerler bir qolymen álemdi, bir qolymen besikti terbetetin ázız analardy erkektermen op-ońaı shatastyryp alady eken. Máselen, atpal azamattardyń tórteýinen tek áıelderde ǵana kezdesetin aýrý «tabylǵan». Atap aıtqanda, úsh naýqastan jatyr moıny, bire­ýinen omyraý bezi isigi aýrýy «anyqtalǵan». Shyndyǵyna kel­gende, olardyń bári qulan-taza kúıde bolǵan. Prokýratýra ókil­deriniń aıtýynsha, osy jerde bir shıkilik jatqan sekildi. Skırıngtik tekserilýge múldem kelmegen turǵyndar tizimge engi­zilip, ár «klıent» úshin dárigerge mem­leketten 3 myń teńgeden tóle­nip otyrǵan syńaıly. Demek, qalta­laryn «qalyńdatý» úshin Gogol romanyndaǵy «óli jandar» esebin kóbeıtý arqyly nebir qýlyq-sumdyqqa barýlary ábden múmkin. Durystap tekserse, jemqorlyq is-árekettiń sıyrdyń búıregindeı bult etip shyǵa kelýi ǵajap emes. «Aq halatty abzal jandar» dep dáriptegende aıaq-qolyn jerge tıgizbeıtin Gıppokrattyń antyna adal kásip ıeleri aıdyń, kúnniń amanynda áıel men erkekti jańy­lystyryp, saý adamdy «aýrý» etip qoıǵany aýrýhana jaǵalap júrgenderdi shoshyndyryp otyr. О́mir ESQALI, «Egemen Qazaqstan». Soltústik Qazaqstan oblysy.