Memleket basshysy Qasym-Jomart Toqaev Ál-Farabı atyndaǵy Oqýshylar saraıynda ornalasqan saılaý ýchaskesine baryp, Qazaqstan Respýblıkasy Májilisi men jergilikti máslıhattar saılaýynda daýys berdi, dep habarlaıdy Egemen.kz Aqordanyń resmı saıtyna silteme jasap.
Buǵan deıin Qazaqstan Respýblıkasynyń Memlekettik keńesshisi Erlan Qarın jáne Premer-mınıstr Álıhan Smaıylov Parlament Májilisi men barlyq deńgeıdegi máslıhat depýtattarynyń saılaýynda daýys bergen edi.
QR Konstıtýsııasyna sáıkes, Parlament Májilisi aralas saılaý júıesi boıynsha Konstıtýsııalyq zańda belgilengen tártippen saılanatyn 98 depýtattan turady. Biryńǵaı jalpyulttyq saılaý okrýgi aýmaǵy boıynsha, ıaǵnı partııalyq tizim boıynsha Májilistiń 69 depýtaty, bir mandatty aýmaqtyq saılaý okrýgteri boıynsha – 29 depýtat saılanady.
19 qańtarda Memleket basshysy Qasym-Jomart Toqaev jetinshi saılanǵan QR Parlamentiniń Májilisin taratý jáne 19 naýryz kúni Parlament Májilisi depýtattarynyń kezekten tys saılaýyn taǵaıyndaý týraly Jarlyqqa qol qoıǵan edi. Bul kúni Májilispen qatar máslıhat depýtattaryn da kezekten tys saılaý usynyldy.