Qostanaı qalasyndaǵy № 11-saılaý ýchaskesine 2 myń 600-den astam saılaýshy tirkelgen. Bul ýchaskege tizimdelgen on shaqty saılaýshy úıden daýys beredi. Olardyń ishinde 102 jastaǵy keıýana bar, dep habarlaıdy Egemen.kz.
«Úıde daýys beretin saılaýshylardyń mekenjaıyna saǵat 12-den keıin baramyz. Mysaly, Nazarbaev dańǵyly №114-shi úıde Ánvar Sharıpova esimdi ájeı turady. Keıýana 100-den assa da sergek, umytyp ketpeı kelińder daýys berýim kerek dep belsendilik tanytyp otyr», deıdi №11 saılaý ýchaskesiniń tóraǵasy Gúlbaný Sultanǵazına.
Atalmysh saılaý ýchaskesinde eń birinshi kelip óz tańdaýyn jasaǵan saılaýshy – 65 jastaǵy zeınetker Nıkolaı Fılıpenkov.
«Erte kelgenim úshin ádemi syı-sııapat alyp, kóńilim kóterilip qaldy. Biz endi memleket qamqorlyǵyndaǵy zeınetker adamdarmyz ǵoı. Eki balam bar. Solardyń turmysy jaqsy bolsa, mektepke baryp júrgen kishkentaı nemerelerim sapaly bilim alsa, medısına damyp, dári-dármek arzandasa, eldiń áleýmettik jaǵdaıy budan da jaqsara tússe eken deımiz. О́zim tańdaý jasaǵan úmitkerler osy máselelerdiń ilgerileýine barynsha atsalysamyz dep otyr. Sol kandıdattarǵa senemin», deıdi saılaýshy.
Qostanaı oblysynda daýys berý quqyna ıe azamattar 500 myńnan asady. Olarǵa 745 saılaý ýchaskesi qyzmet kórsetip jatyr.