Uly ǵulama, oıshyl, aqyn Shákárim Qudaıberdiulynyń 165 jyldyǵyna oraı Astanda «Shákárim oqýlary» respýblıkalyq baıqaýy ótti. Elimizdiń barlyq aýmaǵyn qamtyǵan rýhanı is-sharany Ulttyq akademııalyq kitaphana uıymdastyrdy. Eki myńnan astam balanynyń úmit otyn jaqqan baıqaýǵa «Adal-as» kompanııasy demeýshilik etken, dep habarlaıdy Egemen.kz.
Áýeli 17 oblys pen 3 megapolıstegi ortalyq kitaphanalardyń aıasynda bastalǵan «Shákárim oqýlaryna» 5-7 synyp oqýshylary arasynan 2000 bala qatysýǵa nıet bildirgen. Aımaqtardaǵy irikteýden súrinbeı ótken 22 oqýshy bilim jarysynyń jartylaı fınalyna ótip, respýblıkalyq baıqaýǵa joldama aldy. Al ozyq oqýshylardyń arasynan shyn júırikti anyqtaıtyn synaqty Ulttyq akademııalyq kitaphana onlaın rejimde ótkizdi. Buǵan qatysqan 22 jas shákárimtanýshynyń arasynan 11 úzdik oqýshy aqtyq synǵa ótip, Astanada ótken qortyndy baıqaýǵa qatysty.
«Ulttyq akademııalyq kitaphana Shákárim muralaryn jalpy adamzatqa ortaq qazyna dep baǵalaı otyryp, bul asyl murany eń aldymen oqýshylardyń jattap, meńgerýi «Mádenı mura» memlekettik baǵdarlamasynda kórsetilgen ulttyq qundylyqtardy nasıhattaý, ult tutastyǵyn nyǵaıtý mindetterin júzege asyrýǵa zor úles qosady dep esepteıdi. Al baıqaýdyń maqsaty – oqýshylardy dana babamyzdyń muralaryn tanyp, zertteýge yntalandyrý boldy. Baıqaýdyń respýblıka kóleminde aýqymdy ótýine oblystardaǵy kitaphanalar yqpal etti» dedi Ulttyq akademııalyq kitaphananyń bas dırektory Ǵazıza Qudaıbergenqyzy.
Bul baıqaýdyń jeńimpazdary men júldegerleri qazylar alqasynyń daýys berý qorytyndysy boıynsha anyqtalǵan.
- «Shákárim oqýlarynyń» maqsaty – oqýshylardy dana babamyzdyń muralaryn tanyp, zertteýge yntalandyrý boldy. Bul mindet oryndaldy, biz úshin izdenimpaz balalardyń júzindegi shattyqty kórip, sezinýdiń ózi jeńis. Shákárim babamyzdyń ǵulamalyq sózderimen, ulaǵatty óleńderimen biz sýsyndap óstik, al qazirgi jas balalardyń uly oıshyldy tanýǵa yqylas tanytqany urpaq sabaqtastyǵy, rýhanı muranyń jalǵastyǵy dep bilemin, - dedi baıqaýǵa demeýshi bolǵan kásipker Ermek Mezibaev.
Baıqaý qorytyndysy boıynsha júzden júırik shyqqan, qaı óleńin de múdirmeı oqyǵan, ádilqazylar tarapynan bolǵan suraqtarǵa tolymdy jaýap bergen Taraz qalasynyń 6 synyp oqýshysy – Aıhanym Qaırat bas júldege ıe boldy. I oryndy Shákárim óleńderin naqyshty oryndaǵan, suraqtarǵa óz oıymen tushymdy jaýap bergen Shymkent qalasynyń 5 synyp oqýshysy Dinmuhammed Kádirhan ıelendi. II oryndy ónerlerimen kózge túsken daryndy úsh úmitker bólisti. Olar: Batys Qazaqstan oblysy Oral qalasynan 6 synyp oqýshysy - Aıarý Ámirtaı, Qyzylorda oblysy Qazaly aýdanynan 7 synyp oqýshy – Gúlnaz Jeńisbek, Shyǵys Qazastan oblysy Altaı aýdanynan Arýjan Aıyrbaı. III oryndy 3 úmitker: Pavlodar oblysynan kelgen 7 synyp oqýshysy - Gúlnaz Bahbergen, Qostanaı oblysy Jangeldi aýdanynan kelgen 7 synyp oqýshysy - Aısha Qosylbek jáne Jetisý oblysy Jargent aýdany Áýlıeaǵash aýylynan kelgen 5 synyp oqýshysy - Júrsin Azıtaı ıelendi. Qalǵan qatysýshylarǵa da yntalandyrý syılyqtary men Alǵys hattar tabystaldy. Bas júlde men I, II, III orynǵa ıe bolǵan júldegerler baǵaly syılyqtar men dıplomdarmen marapattaldy.
Baıqaýǵa shákirtterin úkilep alyp kelgen jetekshilerge Mádenıet jáne sport vıse-mınıstri N.Dáýeshovtiń atynan Alǵys hat, shákirtterin myqty daıyndaǵan ustazdarǵa M.Áýezovtiń 125 jyldyǵyna arnalǵan mereıli tós belgisin, eń úzdik óner kórsetken oqýshylardy daıyndaǵan Qoısynaı Jasuzaqova men Kúlzıpa Haırýllınaǵa jáne bas júlde alǵan júldegerdiń jetekshisi Áıgerim Bekpatshaevaǵa «Qazaqstannyń bilim berý isiniń qaıratkeri» tósbelgisi tabystaldy. Balalaryna qoldaý bildirip, daryndy etip tárbıelegen ata-analarǵa da tósbelgi jáne baǵaly syılyqtar men Alǵys hattar berildi. Atalǵan baıqaý kezeńderinde úlgili daıyndyqtarymen kózge túsken kitaphanalar QR Mádenıet jáne sport vıse-mınıstri N.Dáýeshovtiń atynan Alǵys hattarmen marapattaldy.