AQSh-tyń Las-Vegas qalasynda ótken UFC-diń kezekti jarysynda aıqyn jeńiske qol jetkizgen Shavqat Rahmonov elge oralǵannan keıin BAQ ókilderine bergen suhbatynda kelesi joly kimdermen kúsh synasýy múmkin jáne aldaǵy ýaqytta kimdermen judyryqtasqysy keletinin jarııa etti. Qazaqtyń qaısar uly AQSh-tyń qos myqtysy – Kolbı Kovıngton men Belal Muhammadtyń esimderin atady.
Joǵaryda esimderi atalǵan jigitterdiń ekeýi de óte qarýly. Kolbı Kovıngton jartylaı orta salmaqta kúsh synasyp júrgen faıterlerdiń reıtınginde ekinshi orynda tur. 35 jastaǵy Kalıfornııa shtatynyń týmasy bozbala shaǵynan bozkilemde ter tókti. Stýdentter arasyndaǵy jarystarda san márte júldeli oryndardy ıelendi. 2012 jyldan beri aralas jekpe-jekten ótetin dúbirli dodalarǵa qatysa bastady. Bastapqy segiz básekesinde jeńiske jetip, óz jankúıerlerin qýantty. Ol Krıs Enslı, Devıd Heız, Djeıson Djekson, Hose Kaseras, Djeı Ellıs, Anın Van, Vagner Sılva jáne Maık Paıldy utty. Alǵash ret Kolbı 2015 jyldyń aıaǵynda jeńilis tapty. Ol brazılııalyq Varleı Alveske ese jiberdi. Odan keıin taǵy jeti kezdesýdi óz paıdasyna sheshti. 2016-2019 jyldary Kovıngton Djonatan Mene, Maks Grıffın, Braıan Barberen, Kım Don Hen, Demıan Maııa, Rafael dýs Andjýs, Robbı Foýlerdi qapy qaldyrdy. Sondaı-aq Kamarý Ýsmannan eki ret utylyp, Taıron Výdlı men Horhe Masvıdaldi tize búktirdi.
2018 jyly ýaqytsha chempıon ataǵyn ıelengen Kolbı Kovıngtonnyń 2019 jáne 2021 jyldary tolyqqandy chempıon atanýǵa jaqsy múmkindigi boldy. Biraq eki retinde de ol Kamarý Ýsmanǵa jol berdi. AQSh sportshysy oktagonda barlyǵy 20 kezdesý ótkizip, olardyń 17-sinde jeńiske jetse, toǵyzyn merziminen buryn aıaqtady.
2022 jyldyń 5 naýryzynda Kovıngton otandasy Horhe Masvıdaldi jeńgeni jaıynda joǵaryda aıttyq. Osy sátsizdikten keıin Horhe qarsylasynan kek alýǵa bekindi. Dál sol kúni Las-Vegastaǵy meıramhanalardyń birinde ol beıqam turǵan Kolbıge oısyrata soqqy jasap, qasqa tisin syndyrdy. Endi basbuzar 15 jylǵa bas bostandyǵynan aıyrylýy múmkin.
UFC-diń reıtınginde tórtinshi satyǵa jaıǵasqan Belal Muhammadtyń jasy – 34-te. Onyń áke-sheshesi – Palestınanyń týmalary. Al sportshynyń ózi Chıkagoda dúnıege keldi. Belal da karerasyn 2012 jyly bastady. Arada tórt jyl ótken soń Titan FC uıymynyń chempıony atandy. Onyń aldynda Bellator promoýsheninde óner kórsetti. 2016 jyly UFC-ge aýysty. Aıqas alańynda barlyǵy 26 jekpe-jek ótkizip, sonyń úsheýinde ǵana utyldy. 22 ret jeńip, taǵy bir básekeniń nátıjesi esepke alynbady. Muhammadqa ese jibergender arasynda Krıs Kertıs, Tım Mıns, Laıman Gýd, Dıego Lıma, Demıan Maııa, Stıven Tompson, Vısente Lýke jáne Shon Bredı sekildi tanymal faıterler bar. Bir aıta keterligi, atalǵan amerıkalyq sportshy óz jeńisteriniń tek altaýyn ǵana aıqyn basymdyqpen aıaqtady.
2016 jyly Muhammad qatarynan eki kezdesýde jeńilistiń kermek dámin tatty. Las-Vegasta Alan Jýbannan upaı sanymen utylsa, Nıý-Iorkte Vısente Lýkeniń aýyr soqqylaryna tótep bere almady. Al 2019 jyly ol Brýklınde uıymdastyrylǵan jarysta Djeff Nıldiń osal tusyn taba almady. Dál osy sańlaqty jýyrda ǵana bizdiń Shavqat Rahmonov qylqyndyryp tastaǵan edi. Sodan keıingi segiz jekpe-jektiń barlyǵynda Belaldyń ústemdigi esh kúmán týǵyzǵan joq.