Barsha jankúıer taıaý kúnderi Astanadaǵy Jaqsylyq Úshkempirov atyndaǵy jekpe-jek saraıynda kúres túrlerinen shymyldyǵy túriletin Azııa chempıonatyn taǵatsyzdana kútip otyr. Al sol dúbirli dodada Qazaqstannyń namysyn kimder qorǵamaq? Kúni keshe elimizdiń ulttyq qurama komandalarynyń bas bapkerleri osy jaýapty jarysta qaı shákirtterine senim artatyndaryn jarııa etti.
Jarysty ádettegideı grek-rım kúresi sheberleri bastaıdy. Bas bapker Serik Jumashev, Amanǵalı Bekbolatov (55 kılo), Ernur Fıdahmetov (60 kılo), Muhamedálı Mamurbek (63 kılo), Almat Kebisbaev (67 kılo), Ibragım Magomadov (72 kılo), Demeý Jadyraev (77 kılo), Dıas Qalen (82 kılo), Nursultan Tursynov (87 kılo), Oljas Syrlybaı (97 kılo) jáne Álimhan Syzdyqovqa (130 kılo) senim artyp otyr. Bul balýandardyń barlyǵynyń da esimi sport súıer qaýymǵa jaqsy tanys. Solardyń arasynan Kebisbaev pen Jadyraevty bóle-jara ataýǵa bolady. Almat álem chempıonatynda bes ret jeńis tuǵyryna kóterilse, Demeý dál sol jarysta bir márte júldegerler qatarynan kórindi. Nursultan men Álimhannyń qorjynynda Azııa chempıonatynyń altyn medali bar. Basqa da jigitter qurlyqtyq deńgeıdegi dodalarda júlde alǵan.
Jarysty odan keıin burymdylar jalǵastyrady. Áıelder kúresi komandasynyń bas bapker Qaırat Saǵadıev Ellada Mahıaddınova (50 kılo), Altyn Shaǵaeva (53 kılo), Marına Sedneva (55 kılo), Nılýfar Raımova (57 kılo), Dıana Kaıýmova (59 kılo), Irına Kýznesova (62 kılo), Álbına Qaıyrgeldınova (65 kılo), Elena Shalygına (68 kılo), Jámıla Baqbergenova (72 kılo) jáne Elmıra Syzdyqovany (76 kılo) bozkilemge shyǵarýdy jón kórgen eken. Bul balýandar arasynda da osaly joq. Elena – Beıjiń Olımpıadasynyń qola júldegeri, Azııa oıyndarynyń jeńimpazy, álem chempıonatynyń úsh dúrkin júldegeri, Elmıra – Rıo Olımpıdasy men Azııadanyń qola júldegeri, Jámıla – álem chempıonatynyń eki dúrkin kúmis júldegeri. Sondaı-aq olar qurlyq chempıonattarynda bir emes, birneshe márte atoı saldy.
Erkin kúresten ulttyq quramanyń bas bapkeri Madııar Quramysovtyń tańdaýy Rahat Qaljan (57 kılo), Nurbolat Ábdýálıev (61 kılo), Muhtar Sanjar (65 kılo), Sanjar Dosjanov (67 kılo), Darhan Esenǵalı (74 kılo), Bolat Saqaev (79 kılo), Azamat Dáýletbekov (86 kılo), Rızabek Aıtmuhan (92 kılo), Bekzat Úrkimbaı (97 kılo) jáne Iýsýp Batyrmurzaevqa (125 kılo) tústi. Osylardyń arasynan Dáýletbekov daralanyp tur. Ol byltyr Belgradta ótken álem chempıonatynda qola medaldi moınynda jarqyratty. Azııa chempıonatynyń tolyq júlde jıyntyǵyn ıelendi. Bul joly da Azamat aldyna jan salmaýǵa tıis.
Alyptarmen aıqasyp júrgen Iýsýp osydan úsh jyl buryn sary qurlyqtyń basty dodasynda dara shyǵyp, 2021 jyly Tokıo Olımpıadasynda baq synady. Bolattyń byltyr Almatyda uıymdastyrylǵan Bolat Turlyhanovtyń memorıalynda otandastarymyzdyń arasynan jalǵyz ózi bas júldeni oljalaǵany da esimizde. Qalǵan jigitterimiz bıyl Qazaqstan Respýblıkasynyń spartakıadasynda ózderiniń myqtylyǵyn moıyndatyp, Astanadaǵy Azııa chempıonatynda óner kórsetýge laıyq ekenderin dáleldedi.