Aýyr atletıkadan Albanııanyń Dýrres qalasynda ótip jatqan jasóspirimder arasyndaǵy álem birinshiliginde Qazaqstan quramasynyń qorjynyna taǵy eki kúmis medal tústi.
Alǵashynda 64 kılo salmaqtaǵy Taısııa Alekseeva óz jankúıerlerin qýantty. Ol 89 kılolyq ziltemirdi julqa, 112 kılony serpe kóterdi. Taısııanyń qossaıystaǵy kórsetkishi – 201 kılo. Ol tek kolýmbııalyq Ingrıd Segýradan (206 kılo) qalyp qoısa, túrikmenstandyq Gýlalek Kakamyradova (196 kılo) úshinshi satyǵa taban tiredi.
89 kılo salmaqtaǵy saıysta Kerem Kýrnazǵa teń keler eshkim tabylmady. Túrkııanyń asa darynda óreni 327 (144+183) kılolyq ziltemirdi eńserdi. Qazaq sportshysy Nurdos Sabyr kúmis medaldi moınyna ildi. Onyń nátıjesi – 321 (145+176). Al qola júlde armenııalyq Valerık Movsısıanǵa buıyrdy.