Qazaqstanda «Bolashaq» stıpendııalyq baǵdarlamasyna qujat tapsyrýdyń ekinshi legi bastaldy. Úmitkerlerdiń qujattary 28 sáýirge deıin eGov.kz elektrondy úkimet portaly arqyly onlaın qabyldanady, dep habarlaıdy Egemen.kz.
2023 jyly «Bolashaq» baǵdarlamasy aıasynda bilim alýǵa 555 stıpendııa bólindi. Onyń ishinde magıstratýra jáne rezıdentýra baǵdarlamalaryna 395 stıpendııa, doktorantýraǵa 50 stıpendııa, taǵylymdamadan ótý úshin 110 stıpendııa bólindi.
Basym mamandyqtar tizimine 262 mamandyq kirdi. Úmitkerler robot-tehnıka, servıstik platformalardy ázirleý, jasyl tehnologııalar, qoǵamdyq densaýlyq saqtaý, ınklıýzıvti bilim berý jáne t.b. syndy eńbek naryǵynda ózekti mamandyqtar boıynsha shetelde daıyndyqtan ótedi.
«Injenerlik-tehnıkalyq jáne medısınalyq kadrlarǵa arnalǵan kvotalar bekitildi. Endi olar aldymen merzimi 12 aıǵa deıingi tildik daıyndyqtan ótip, sheteldik joǵary oqý ornyna jeńildetilgen sharttarmen túse alady. Olarǵa shaqyrtý tapsyrý talaby qoıylmaıdy. Bul atalǵan baǵyttar boıynsha túsetinder úshin múmkindikterdi keńeıtedi.
«Sonymen qatar bıyl úmitkerlerge qoıylatyn talaptar kúsheıtildi. Endi doktorantýraǵa túsetinderdi qospaǵanda, kandıdattardyń barlyǵy shet tili boıynsha sertıfıkat tapsyrýǵa mindetti», dedi «Halyqaralyq baǵdarlamalar ortalyǵy» AQ basqarma tóraǵasy Oljas Sákenov.
Bıylǵy taǵy bir jańalyq - baǵdarlama aıasynda oqytýdy qosa qarjylandyrý bekitildi. Sheteldik JOO-nyń grantyn utyp alǵan úmitkerlerdiń «Bolashaq» sheńberinde qosymsha qarjylandyrýdy alýǵa múmkindigi bar. Mundaı stıpendıattar úshin eńbek ótili 1 jylǵa qysqardy.
Eske sala keteıik, bıyl alǵashqy leginde Shetelde kadrlar daıarlaý jónindegi respýblıkalyq komıssııanyń sheshimimen «Bolashaq» stıpendııasy 25 qazaqstandyqqa taǵaıyndaldy.
Jyl sońyna deıin ótinimderdi qabyldaýdyń taǵy eki legi ótedi. Atap aıtqanda, 5 maýsym men 7 shilde aralyǵynda, sonymen qatar 17 shilde men 15 qyrkúıek aralyǵynda ótinimder qabyldanady.