Astanada jalaýy jelbiregen shahmattan 17-shi álem chempıonatynyń alǵashqy jarys kúni óz máresine jetti. Byltyrǵy úmitkerler týrnıriniń jeńimpazy Iаn Nepomnıashıı men Madrıdtegi dodanyń ekinshi oryn ıegeri Dın Lıjen arasynda álem chempıony ataǵy úshin ótip jatqan básekeniń alǵashqy partııasy bes saǵatqa jalǵasyp, 49 júristen keıin teń aıaqtaldy.
Chempıonattyń tusaýkeser matchyndaǵy alǵashqy saltanatty júristi Mádenıet jáne sport mınıstri Ashat Oralov pen Halyqaralyq shahmat federasııasynyń prezıdenti Arkadıı Dvorkovıch jasady. Keıinnen álemniń eń tańdaýly eki grossmeısteri 14 matchqa jalǵasatyn chempıonattaǵy básekelerin bastady.
Bir kún buryn alǵash ret robottyń kómegimen júrgizilgen jerebe tartý rásiminde birinshi partııany Iаn Nepomnıashıı aq tastarmen bastaıtyny belgili bolǵan edi. Sóıtip álem chempıonatyn aq tastarmen bastap bergen reseılik shahmatshy Iаn Nepomnıashıı qansha jerden saýatty júris jasap, match boıy tabandy oıyn kórsetkenimen, qara taspen oınaǵan qytaılyq Dın Lıjendi qapy qaldyra almady. Álemdik reıtıngte úshinshi satyǵa jaıǵasqan D.Lıjen saýatty qorǵanyp, qarsylasyna esh múmkindik bergen joq. Nátıjesinde, birinshi jarys kúninde jeńimpaz anyqtalǵan joq.
Oıynnan keıingi baspasóz máslıhatynda Dın Lıjen match aldynda ózin azdap yńǵaısyz sezingenin jáne alǵashqy básekege eshqandaı josparsyz kelgenin aıtty. Sondaı-aq ol birinshi oıyn kúni bolǵandyqtan ishki emosııasymen biraz arpalysqanyn da jasyrǵan joq.
«Kezdesýdiń bastapqy bóliginde jaqsy oınadym dep oılaımyn. Álem chempıonatyndaǵy alǵashqy match bolǵan soń ba azdap qobaljý boldy. Dese de búgingi oıynyma kóńilim tolady», dedi ol.
Al reseılik shahmatshy Iаn Nepomnıashıı baspasóz jıynynda chempıonattaǵy tusaýkeser kezdesýine kóńili tolmaǵanyn málimdese de, teń nátıjege razy ekenin aıtty.
Keshe shahmatshylar álem chempıonatyndaǵy ekinshi matchyn ótkizdi. Sportshylar búgin bir kún demalyp, keıingi básekelerine daıyndalady. Jahandyq dodanyń erejesine sáıkes, oıynshylarǵa ár 2 týrdan keıin bir kúndik demalys beriledi. 14 matchqa jalǵasatyn álem birinshiliginiń oıyndary elordadaǵy St. Regis Astana qonaqúıinde ótip jatyr. Matchtar Astana ýaqyty boıynsha saǵat 15.00-de bastaldy.
Freedom Holding Corp kompanııasynyń qoldaýymen ótip jatqan álem chempıonaty 1 mamyrǵa deıin jalǵasady. Osy ýaqyt aralyǵynda alǵash bolyp 7,5 ball jınaǵan shahmatshy jeńimpaz atanady. Eger teń tússe, báseke taı-breıkke deıin jalǵasady.