«Ańsaǵan sábı» baǵdarlamasy aıasynda bosanǵan Baıqońyr qalasynyń 31 jasar turǵyny Áıgerim Álimhanova qyzdaryna Aılın, Anel, Adel degen esim beripti. Bul týraly Egemen.kz Aikyn.kz saıtyna silteme jasap habarlaıdy.
Qyzylorda oblystyq densaýlyq saqtaý basqarmasy usynǵan aqparatqa qaraǵanda, atalmysh baǵdarlama 2021 jyldan bastap elimizde qosalqy reprodýktıvti tehnologııalardyń kómegimen otbasylyq-demografııalyq problemalardy sheshýge járdemdesý maqsatynda iske qosylǵan.
Baǵdarlama aıasynda 2021 jyly Qyzylorda oblysyna 281 kvota bólingen, sonyń negizinde EKU arqyly 119 bala týylyp, 3 otbasynda egiz sábıler dúnıege kelgen eken.
Aıta ketsek, 2022 jyly bólingen 277 kvota da tolyq paıdalanylǵan. Bıyl bul baǵdarlama boıynsha 274 kvota bólinse, búgingi kúni onyń 92-si ıgerilgen.
Atalmysh baǵdarlama aıasynda sábıli bolǵan baıqońyrlyq ana men nárestelerdiń jaǵdaıy jaqsy. Shaqalaqtar 1180, 1200, 1400 gramm bolyp týylǵan.
Úshem Baıqońyr qalasynda týylyp, sol kúni sanıtarlyq avıasııa jelisi arqyly oblystyq perınataldyq ortalyqqa jetkizilgen.