Klassıkalyq shahmattan Astanada ótip jatqan álem chempıonatynyń ekinshi partııasy Iаn Nepomnıashııdiń jeńisimen aıaqtaldy. Reseılik grossmeıster bul joly qara fıgýramen oınasa da, básekeni aq fıgýramen bastaǵan qytaılyq Dın Lıjendi nebári 29 júriste súrindirdi.
Álem chempıony ataǵynan úmitker eki shahmatshy da básekeniń alǵashqy partııasyn asa saqtyqpen bastap, qatelik jasamaýǵa tyrysqan edi. Sondyqtan bolar, birinshi partııa bes saǵattan asa ýaqytqa jalǵasty. Al ekinshi partııanyń alǵashqy mınýttarynda úmitkerler óte belsendi boldy. Aınaldyrǵan 1-2 mınýttyń ishinde ekeýi de úsh júristen jasap úlgerdi. Tórtinshi júriske kelgende qytaılyq grossmeıster Dın Lıjen barsha shahmat sarapshylary men jankúıerlerin tańǵaldyryp, eshkim kútpegen h3 júrisin jasady. Sóıtti de ornynan turyp, óz bólmesine ketip qaldy. Al mundaıdy kútpegen Iаn Nepomnıashıı de óz emosııasyn jasyra almaı, bir jymıyp aldy.
Oıynnan keıingi baspasóz máslıhatynda jýrnalıster Iаn Nepomnıashııden qarsylasynyń kútpegen júrisi týraly pikirin suraǵanda ol: «Árıne, bul júristi Lıjenge onyń sekýndanty Rıchard Rapporttyń usynǵanyn birden túsindim. Bul júristiń qanshalyqty utymdy ıakı sátsiz bolǵanyn aıta almaımyn. Biraq Dınniń ózindik ıdeıasy boldy jáne ol iske asqan sııaqty», dedi reseılik shahmatshy.
Dın Lıjen bul qadamǵa ne úshin barǵanyn bylaı túsindirdi: «Jalpy, bul júris shahmatta óte sırek kezdesedi. Muny maǵan sekýndanttarym usynǵan edi. Menińshe, jaqsy júris bolǵan sııaqty. Sebebi h3 júrisinen keıin mende alǵa qadam jasaýǵa kóp múmkindik bolatynyn túsindim. Biraq búgin bul júris maǵan kómektespedi», dedi D.Lıjen.
Sonymen qatar qytaılyq grossmeıster bulaı jeńilý óte uıat jaǵdaı ekenin de jasyryp qalǵan joq. «Men partııanyń bastapqy kezeńinde ne bolyp jatqanyn asa qatty túsine qoıǵan joqpyn. Tek qarsylasym F5 júrisin jasaǵannan keıin ári qaraı oınaý maǵan aýyr boldy. Al at S6 júrisinen soń men bul partııada jeńilgenimdi túsindim. Ekinshi partııanyń taǵdyryn osy júris sheship ketken sııaqty», dep sózin aıaqtady Dın Lıjen.
Al Iаn Nepomnıashıı 18-shi (f5) júrisinen keıin óz jeńisine senimdi bolǵanyn aıtty. Osylaısha, úsh jarym saǵatqa jalǵasqan matchta Nepomnıashıı jeńiske jetip, jalpy esepte alǵa shyqty – 1,5 – 0,5.
Keshe úmitkerler ereje boıynsha alǵashqy eki partııadan keıingi alǵashqy demalys kúnin ótkizdi. Nepomnıashıı bul kúndi kóbirek uıqyǵa arnaıtynyn aıtsa, Dın demalysta da daıyndyǵyn jalǵastyratynyn jetkizdi. Al búgin shahmatshylar úshinshi partııada sheberlik baıqasady.