О́skemenniń irgesindegi shoshqa fermasyna qatysty daýǵa sot sheshimi núktesin qoıǵan shyǵar desek, jeke kásipker áli kúnge deıin sharýasyn esh alańsyz dóńgeletip otyr. Basshylyqtyń pármensizdigine narazy bolǵan Stepnoe, Leshoz aýylynyń turǵyndary BAQ ókilderine taǵy habarlasty.
Eldi mekenniń qaq ortasynda júzdegen shoshqa baǵyp otyrǵan kásipkerge turǵyndar baıaǵydan qarsylyq bildirip kele jatyr. Aıtýlaryna qarasaq, dońyzdyń nájisi topyraqqa sińip qalǵany sonshalyq, sol mańaıdaǵy qudyqtardan sý ishý múmkin bolmaı qalǵan. Al tóńirektegi ıis jyl on eki aı qolqany qabady. Qar erip, kóktem shyqqan ýaqytta kúlimsi ıis kıimge deıin sińip qalady eken. Aınalyp kelgende, shoshqa fermasy qorshaǵan ortaǵa edáýir zııan shektirip otyr.
Jýyqta О́skemen qalalyq ákimdiginiń ókilderi, quqyq qorǵaý, ShQO boıynsha ekologııa departamentiniń qyzmetkerleri jáne BAQ ókilderi О́skemen qalasynyń irgesindegi Leshoz aýylyna baryp, shoshqalardy zańsyz ósirý jáne soıý faktisi boıynsha jergilikti turǵyndarmen kezdesý ótkizdi.
Esterińizge sala keteıik, Shyǵys Qazaqstan oblysynyń mamandandyrylǵan aýdanaralyq ekonomıkalyq sotynyń 2022 jylǵy 21 qarashadaǵy №6309-22-00-2/3005 sheshimimen ShQO boıynsha ekologııa departamentiniń «Mıtın A.B.» JK-ne talap-aryzy negizinde О́skemen qalasynyń Shmelov Log aýdanyndaǵy shoshqa fermasynyń jáne Leshoz kentindegi soıý sehynyń qyzmeti toqtatylǵan edi. Alaıda Leshoz turǵyndary BAQ ókilderine sot sheshiminiń oryndalmaǵany týraly aıtyp, oblystyq ekologııa departamentine soıý sehyna qatysty sharalar qabyldaýdy surap taǵy da habarlasqan. Kezdesýde bul másele taǵy ótkir kóterildi.
– Soıý sehyna irgeles aýmaqty tekserý barysynda turǵyndardyń dálelderi rastalǵany anyqtaldy. «Mıtın A.B.» JK áli kúnge deıin shoshqa asyrap otyr. Onyń ýchaskesinen shoshqa nájisimen lastanǵan erigen qar sýy kóshege aǵyp jatyr. Atmosferalyq aýada shoshqa fermasynan shyǵatyn adam tózgisiz ıis jáne bar. Onyń quramyndaǵy zattar adam densaýlyǵyna zııan. Osyǵan baılanysty jergilikti turǵyndarmen kezdesý nátıjeleri boıynsha jáne usynylǵan materıaldar negizinde ekologııa departamenti ádilet departamentine О́skemen qalasynyń Shmelov Log aýdanyndaǵy shoshqa fermasynyń jáne Leshoz kentindegi soıý sehynyń qyzmetin toqtatý týraly atqarýshylyq is qozǵaýǵa qaıta bastamashylyq jasaıdy, – dedi ShQO ekologııa departamentiniń memlekettik bas mamany Aqnur Qunafına.
Al oblystyq ádilet departamentindegiler tekserý kezinde fermada talpaq tanaýlardyń bolmaǵanyn aıtady.
– Osydan keıin О́skemen qalasy boıynsha sot aktilerin oryndaý bóliminiń memlekettik sot oryndaýshysy E.Qýanyshbaev sot sheshiminiń oryndalýyna baılanysty 2023 jyldyń 4 sáýirinde óz qaýlysymen atqarýshylyq is júrgizýdi toqtatty. Oǵan Stepnoe jáne Leshoz kentterindegi shoshqa fermasyna barýy qajet bolǵan. Fotomaterıaldarǵa sáıkes shoshqa fermasynda janýarlar shyn máninde joq boldy. Tekserý ketken soń jumysyn qaıta bastaýy da múmkin. Qazir sol sot oryndaýshy eńbek demalysynda. Al biz turǵyndar jáne ekologtar shaǵymyna oraı tekserýdi qaıta bastaımyz, – dedi ádilet departamenti atqarýshylyq óndiristi qamtamasyz etý bóliminiń basshysy Nurjan Qurmanǵalıev.
Aýany da, jerdi de, sýdy da lastap otyrǵan kásipkerdiń ózi tóbe kórsetpek túgili baılanysqa da shyqpady. Turǵyndardyń aıtýynsha, «Meniń fermam jumysyn toqtatpaıdy» dep mysqyldaıtyn da kórinedi. Bul másele jaýapty quzyrly mekemeler tarapynan erekshe baqylaýǵa alyndy. Al núktesi qashan qoıylary áli belgisiz. Sot sheshimi nege pármensiz, ol jaǵy taǵy túsiniksiz.
О́skemen