Shaıbaly hokkeıden Qazaqstan ulttyq quramasy men QHL-da óner kórsetetin elordalyq «Barys» klýbynyń oıynshylary Egor Petýhov, Anton Sagadeev jáne Alekseı Maklıýkov (2017-2021 jyldary «Barys» sapynda oınaǵan) Qazaqstan azamattyǵynan bas tartty.
Shaıba.kz ınternet basylymynyń málimeti boıynsha, joǵaryda aty atalǵan úsh oıynshy Reseı azamattyǵynda qalyp, el quramasy sapynda oınaýdan bas tartqan. Buǵan deıin E.Petýhov «Barys» sapynan ketetini aıtylǵan. A.Maklıýkov sońǵy eki maýsymdy Magnıtorskiniń «Metallýrg» klýbynda óner kórsetse, keıingi tórt jylda «Barystyń» namysyn qorǵaǵan A.Sagadeev endi karerasyn «Sochıde» jalǵastyrmaqshy.
Reseıdiń Barnaýl qalasynda dúnıege kelgen Egor Petýhov Qazaqstan azamattyǵyn 2013 jyly, Máskeý oblysynda týǵan Alekseı Maklıýkov 2018 jyly alǵan. Al Anton Sagadeev Qazaqstannyń týmasy bolsa da, kók pasporttan bas tartqan.
Qazirgi tańda shaıbaly hokkeıden ulttyq qurama 2023 jylǵy Latvııanyń Rıga, Fınlıandııanyń Tampere qalasynda ótetin álem chempıonatyna daıyndalyp jatyr. Toptyq kezeńde Qazaqstan Kanada, Chehııa, Latvııa, Slovakııa, Slovenııa, Norvegııa jáne Shveısarııamen oınaıdy.